औषधि तथा स्वास्थ्य सामग्रीसम्बन्धी विधेयकमा असहमति जनाउँदै व्यवसायीले बुझाए सभामुखलाई ज्ञापनपत्र
१५ असोज २०८० १५:४१
नेपाल औषधि व्यवसायी संघले सभामुख देवराज घिमिरेलाई ‘औषधि तथा स्वास्थ्य सामग्री (नियमन तथा नियन्त्रण) ऐन’ सम्बन्धी विधेयकका कतिपय प्रावधानमा असहमति जनाउँदै ज्ञापनपत्र बुझाएको छ ।
संघका उपाध्यक्ष रामचन्द्र शर्मा नेतृत्वको प्रतिनिधिमण्डलले औषधि व्यवसायी संघजस्ता सरोकारवालासँग छलफल नगरी ऐन ल्याइएको भन्दै असन्तुष्टि जनाएको हो । संघका अध्यक्ष प्रकाशकुमार खण्डेलवालद्वारा हस्ताक्षरित ज्ञापनपत्रमा ‘औषधि तथा स्वास्थ्य सामग्री सल्लाहकार समिति’ मा नेपाल औषधि व्यवसायी संघलाई सदस्य नराखिएकाले संशोधन माग गरिएको छ ।
‘औषधिजस्तो संवेदनशील वस्तुसम्बन्धी ऐनको मस्यौदा बनाउँदा ५० वर्षभन्दा बढी यही क्षेत्रमा योगदान गरेको महत्त्वपूर्ण सरोकारवाला संस्था नेपाल औषधि व्यवसायी संघलाई सम्बन्धित पक्षले कुनै पनि जानकारी नदिएको व्योहोरासमेत अवगत गराउँदछौं,’ ज्ञापनपत्रमा भनिएको छ । संस्थागत प्रतिनिधित्व सुनिश्चित हुने गरी संघले संशोधन विवरणसमेत पेस गरेको छ ।
प्रतिनिधिसभा सदस्य प्रदीप पौडेलले असोज १२ गते गैरसरकारी विधेयक दर्ता गराएका थिए ।
सभामुख घिमिरेले संघको मागबारे आफ्नो ध्यानकर्षण भएको बताउँदै आवश्यक छलफल गर्ने उल्लेख गरे ।
संघीय संसद सचिवालयका प्रवक्ता एकराम गिरीले गैरसरकारी विधेयकका प्रक्रियाबारे जानकारी गराएका थिए ।
ज्ञापनपत्र बुझाउन उपाध्यक्ष रामचन्द्र शर्मा, महासचिव श्रीधर खनाल, कोषाध्यक्ष सम्राटमान जोशी, बागमती प्रदेश अध्यक्ष ध्रुवनारायण श्रेष्ठ, काठमाडौं जिल्ला अध्यक्ष बद्रीप्रसाद श्रेष्ठ, ललितपुर जिल्ला अध्यक्ष ईन्द्रबीर महर्जन, भक्तपुर जिल्ला अध्यक्ष नारायणप्रसाद भुसाल, काठमाडौं जिल्ला महासचिव शुभमान श्रेष्ठलगायतका पदाधिकारी सहभागी थिए ।
प्रतिक्रिया