सहायक रथी यमबहादुर अधिकारीको खारेज हुने पदको म्याद थपियो
२ असोज २०८० ८:०२
सरकारले आफ्नै पूर्व निर्णयलाई संशोधनगर्दै पूर्व लडाकुबाट समायोजन भएर विशेष पदमा बढुवा भएका सहायक रथी यमबहादुर अधिकारीको पदावधि थपेको छ ।
तत्कालीन प्रधानमन्त्री केपी शर्मा ओली सरकारको कार्यकालमा एक पटकका लागि भनेर थपिएको नेपाली सेनाको सहायक रथी (ब्रिगेडियर जनरल) पदको पदावधि थपिएको हो ।
प्रधानमन्त्री पुष्पकमल दाहाल ‘प्रचण्ड’ को पहलमा सत्तारूढ गठबन्धनले नेपाली सेनामा चार वर्षपछि स्वतः खारेज हुने गरी सिर्जना गरेको सहायक रथीको विशेष पदको मन्त्रिपरिषदबाट विशेष निर्णय गरेर लम्ब्याएको हो ।
रक्षा मन्त्रालयस्थित विश्वस्त स्रोतका अनुसार तत्कालीन जनमुक्ति सेनाका लडाकु यमबहादुर अधिकारी ‘प्रतीक्षा’ लाई नेपाली सेनाको सहायक रथीमा पदावधि थप्ने प्रस्तावमा सकारकाले निर्णय गरेको हो ।
यद्यपी, यो निर्णय कुन मन्त्रिपरिषद् बैठकले गरेको हो सार्वजनिक गरिएको छैन् । सहायक रथी अधिकारीको म्याद भदौं मसान्तसम्म मात्र थियो ।
सैनिक नियमावलीअनुसार सहायक रथीको पदावधि तीन वर्षसम्म थप्न सकिन्छ । अघिल्लो मन्त्रिपरिषदले चार वर्ष पदावधि र एक पटकलाई भनेर सहायक रथी पद सिर्जना गरेको थियो ।
तत्कालीन जनमुक्ति सेनाबाट नेपाली सेनामा समायोजन गरिएका अधिकारीलाई ३१ भदौ २०७६ मा तत्कालीन केपी शर्मा ओली नेतृत्वको नेकपा (माओवादी केन्द्रसहित) सरकारको मन्त्रिपरिषद बैठकले सहायक रथीमा बढुवा गरेको थियो । सरकारले विशेष पद सिर्जना गरेर अधिकारीलाई सहायक रथीमा पदोन्नति गरिएको त्यसबेला बताइएको थियो । चार वर्षको पदावधि सकिएपछि उनको पद स्वतः खारेज हुने दाबी सरकारको थियो ।
तत्कालीन विद्रोही माओवादी शान्ति प्रक्रियामा आएपछि गरिएको समायोजनका क्रममा उपसेनानीमा नियुक्त गरिएका अधिकारीलाई त्यसको केही समयमै महासेनानी (कर्णेल) बनाइएको थियो । तत्कालीन विद्रोही नेकपा माओवादी शान्ति प्रक्रियामा आएसँगै बृहत् शान्ति सम्झौताअनुसार संयुक्त राष्ट्रसंघीय मिशन अनमिनले प्रमाणीकरण गरेका १९ हजारभन्दा बढी लडाकुमध्ये १४ सयभन्दा बढी नेपाली सेनामा समयोजन भएका थिए ।
तीमध्ये राजनीतिक सहमतिअनुसार तालिममा सहभागी ७१ जना पूर्वलडाकु सबैलाई नौमहिने तालिम दिएर उपसेनानी (लेफ्टिनेन्ट), त्यसपछि तीनमहिने विशेष तालिम गराएर सहसेनानी ९क्याप्टेन० र सेनानी (मेजर) मा बढुवा गरिएको थियो । तीमध्ये तीन जनालाई गणपति तालिम दिएर प्रमुख सेनानी (लेफ्टिनेन्ट कर्णेल) र गणपति तालिमपछि प्रमुख सेनानी बनेका तीन जनामध्ये अधिकारीलाई महासेनानीमा बढुवा गर्न नेपाली सेनाले सरकारसमक्ष सिफारिस गरेको थियो ।
किन म्याद मात्र थपेको होला? बढुवा गरेको भयपनि कसले बिरोध गर्थ्यो र!
किन म्याद मात्र थपेको होला? बढुवा गरेको भयपनि कसले बिरोध गर्थ्यो र!