बूढीगण्डकी जलविद्युत आयोजनाको काम अघि बढाउन माग

राष्ट्रिय स्वतन्त्र पार्टीका उपाध्यक्ष डीपी अर्यालले सरकारले देशको आवश्यकता महसुस गरेर बूढीगण्डकी जलविद्युत आयोजनाको काम अघि बढाउनुपर्नेमा जोड दिएका छन्।

सरकारले देशको आवश्यकताको आयोजनाका सम्बन्धमा निर्णय गरेर अघि बढ्न नसक्दा बूढीगण्डकीको कामले गति लिन नसकेको भन्दै उनले सरकारले देशका लागि आवश्यक आयोजना हो भनेर प्राथमिकतामा राखे तुरून्तै उक्त आयोजना सुरू हुने बताए।

शुक्रबार गृहजिल्ला धादिङ पुगेका संघीय सांसद अर्यालले पत्रकार भेटघाटमा भने, ‘सरकारले चासो र ग्यारेन्टी लिन पर्‍याे, अनि पो जनता ढुक्क हुन्छौं। लगानी गर्ने वातावरण बन्छ अनि जनताकै पैसाले बूढीगण्डकी आयोजना बन्छ। विदेशी लगानी पनि चाहिँदैन।’

मुआब्जा वितरण, कार्यालय स्थापना र व्यवस्थापनका नाममा भ्रष्टाचार भइरहेको उल्लेख गर्दै उनले समय गुज्रँदै जाँदा आयोजना बनाउन महँगो बन्ने संकत देखिएको बताए।

‘बूढीगण्डकीलगायत ठूला आयोजना बन्नु भनेको देश समृद्धितर्फ लाग्नु हो। तर, भाषणमै सीमित हुनुभन्दा काम गरे पो देश समृद्ध हुन्छ। त्यसैले रोकिएका मुआब्जा दिएर काम अघि बढाउनुपर्छ,’ सांसद अर्यालले भने, ‘धादिङ र गोरखाको मात्रै नभएर देशकै मुहार फेर्ने आयोजना निर्माणमा सबै मिलेर अघि बढ्न जरूरी छ।’