चारदेशीय महिला टी-२० सिरिजमा नेपालले कुवेतलाई हरायो

आईसी विमेन्स टी-२० चारदेशीय छनोट सिरिजमा दोस्रो जित हात पार्ने क्रममा नेपालले कुवेतलाई हराएको छ । मलेसियामा बुधबार भएको खेलमा नेपालले कुवेतलाई ३४ रनले पराजित गरेको हो ।

इन्दु बर्माको अलराउन्डर प्रदर्शनको योगदान नेपालका लागि सहयोगी रह्यो । उनले ब्याटिङतर्फ १९ बलको सामना गरेर २ चौकाको सहयोगमा २३ रन बनाउँदा बलिङतर्फ भने ४ ओभर खेलेर मात्र १० रन दिँदै कुवेतको ३ विकेट लिन सफल भइन् ।

बायोमास क्रिकेट ओभलमा टस गुमाएको पहिलो ब्याटिङ गरेको नेपालले २० ओभरमा ८ विकेट गुमाएर मात्र ८९ रन बनाएको थियो । तर, ९० रनको विजय लक्ष्य पछ्याएको कुवेत २० ओभरमा ८ खेलाडी गुमाएर मात्र ५५ रनमा समेटियो ।

नेपालका लागि प्रारम्भिक ब्याट्सम्यान पूजा महतो बिनारन बाहिरिँदा उनीसँगै आएकी बिन्दु रावलले २० रनको योगदा गरिन् । यस्तै सम्झना खड्का १, सीता रानामगर ७ रन, कप्तान रूबिना क्षेत्री ५ रन, काजोल श्रेष्ठ १९ रन र खुसी डंगोल १ रनमा नटआउट रहिन ।

नेपालका लागि बलिङतर्फ खुसी डंगोलले पहिलो डेब्यूमै ३ ओभरमा २ मेडनसहित ३ रन खर्चेर २ विकेट लिँदा ईश्वरी विष्ट, कविता कुँवर र सीता रानामगरले एक एक विकेट लिन सफल भए ।

नेपालले यसअघि सिरिजको पहिलो खेलमा हङकङलाई ६ विकेटले हराएको थियो ।

चार देश सम्मिलित सिरिजमा नेपाल २ खेलमा २ जितका साथ ४ अंक जोडेर शीर्ष स्थानमा रहेको छ । नेपालले आफ्नो अन्तिम खेल शुक्रबार घरेलु टोली मलेसियाविरूद्ध खेल्नेछ ।