‘ब्रेक शु’ बाट निकालेर जोख्न थालियो तस्करीको सुन 

नेपाल राष्ट्र बैंकको टक्सार महाशाखाले आजदेखि सुनको मात्रा र गुणस्तर पत्ता लगाउने प्रक्रिया सुरू गरेको छ । महाशाखाका प्रमुख थानेश्वर आचार्यले आजदेखि सुन छुट्याउने काम सुरू गरिएको र भोलिसम्म सक्ने जानकारी दिए । सुन छुट्याइसकेपछि एक दिन सुन गाल्न समय लाग्ने र त्यसपछि आर्थिक परीक्षणको काम सुरू गरिने उनको भनाइ छ ।

उनले सबै सरोकारवाला प्रतिनिधिको रोहबरमा सुन गाल्ने प्रक्रिया सुरू भएको जानकारी दिए । राजस्व अनुसन्धान विभागले यही साउन ३ गते सिनामङ्गलस्थित भन्सार कार्यालयबाट बाहिरिएको सुनसहितको १५५ किलो ‘ब्रेक शु’ बरामद गरेको थियो । बरामद गरिएको सुनसहितको ब्रेक शु टक्सार महाशाखामा राखिएको थियो ।

सुन बरामद भएको १९ दिनपछि प्रधानमन्त्री पुष्पकमल दाहाल ‘प्रचण्ड’ को निर्देशनमा सुन प्रकरणको अनुसन्धानको जिम्मा नेपाल प्रहरीको केन्द्रीय अनुसन्धान ब्यूरो (सीआईबी) लाई दिइएको थियो । सीआईबीको पत्रपछि आजदेखि सुन गाल्ने लगायतका प्रक्रिया सुरू गरिएको हो ।