सदनको गतिरोध खुलाउन शीर्ष नेतासँग छलफल गर्दै सभामुख

सङ्घीय संसद्को अवरोध खुलाउन प्रतिनिधिसभाका सभामुख देवराज घिमिरेले आज प्रमुख तीन दलका शीर्ष नेताको बैठक बोलाएका छन्।

सिंहदरबारस्थित सभामुखको कार्यकक्षमा बस्ने बैठकमा सत्तापक्ष र प्रमुख प्रतिपक्षका नेतालाई सदनको अवरोध खोल्न सभामुख घिमिरेले पुनः आग्रह गर्ने उनकाे सचिवालयले जनाएको छ।

सभामुखले प्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ङ’ सहित प्रमुख विपक्षी दल नेकपा (एमाले) का अध्यक्ष केपी शर्मा ओली र नेपाली कांग्रेसका सभापति शेरबहादुर देउवा तथा प्रमुख दलहरूका प्रमुख सचेतक र सचेतकलाई बोलाएका छन्।

यही साउन १० गतेको प्रतिनिधिसभाको बैठकमा एमालेले त्रिभुवन अन्तर्राष्ट्रिय विमानस्थलबाट अवैध रूपमा भित्रिएर बरामद सुनकाण्डबारे उच्चस्तरीय छानबिन समिति माग गर्दै बैठक अवरूद्ध गरेपछि त्यसपछिका दुईवटा बैठक सूचना टाँसेर स्थगित भएको छ। राष्ट्रियसभाको बैठक पनि स्थगन हुँदै आएको छ।

दुवै सदनको बैठक आज दिउँसो १ बजे बस्ने तय गरिएकाले सो अगाडि सहमतिको पहल गर्न लागिएको हो। निकासका लागि सभामुख घिमिरेले साउन १५ र १६ गते प्रधानमन्त्री र विपक्षी दलका नेतासँग दुई-दुई पटक टेलिफोन संवाद गरेका थिए भने प्रमुख सचेतक र सचेतकसँग विभिन्न चरणमा छलफल गरेका थिए।