माओवादीका नेताहरूकाे जिम्मेवारी फेरबदल

सत्तारूढ नेकपा (माओवादी केन्द्र) ले नेताहरूको जिम्मेवारी फेरबदल गरेको छ। आज बिहान प्रधानमन्त्री निवास बालुवाटारमा पार्टी पदाधिकारी बैठकले गरेको निर्णयलाई केन्द्रीय समितिको बैठकले अनुमोदन गरेको हो।

प्रधानमन्त्री एवम् पार्टी अध्यक्ष पुष्पकमल दाहाल ‘प्रचण्ड’ ले पार्टीका नेताको जिम्मेवारी तोकेकाे र फेरबदल गरेकाेसम्बन्धी प्रस्ताव पेस गरेकाे प्रधानमन्त्रीका प्रेसविज्ञ मनोहरि तिमिल्सिनाले जानकारी दिए।

सोबमोजिम पार्टीका उपमहासचिव वर्षमान पुनलाई विशेष प्रदेश इञ्चार्ज बनाएको छ। गैरभौगोलिक प्रदेशका रूपमा चिनिने विशेष प्रदेश समितिका रूपमा कार्यरत सो प्रदेशलाई थप प्रभावकारी बनाउन नेता पुनलाई उक्त जिम्मेवारी दिइएको हो।

यस्तै उपमहासचिव जनार्दन शर्मालाई वागमती प्रदेश इञ्चार्जको जिम्मेवारी दिइएको छ। सचिव लीलामणि पोखरेललाई मधेस प्रदेश इञ्चार्ज र सचिव देवेन्द्र पौडेललाई गण्डकी प्रदेश इञ्चार्जको जिम्मेवारी दिइएको छ। यसैगरी चक्रपाणि खनाललाई कोशी प्रदेश इञ्चार्ज, हितमान शाक्यलाई लुम्बिनी प्रदेश इञ्चार्ज, मात्रिका यादवलाई कर्णाली प्रदेश इञ्चार्ज र डिलाराम आचार्यलाई सुदूरपश्चिम प्रदेश इञ्चार्जको जिम्मेवारी दिइएको छ।

नेता गिरिराजमणि पोखरेललाई उपत्यका सम्पर्क समन्वय प्रदेश इञ्चार्जको जिम्मेवारी दिइँदा नेता राम कार्कीलाई प्रवास प्रदेशको इञ्चार्जको जिम्मेवारी दिइएको छ।

त्यस्तै समाजवादी मोर्चा र पार्टी एकता संयोजनको जिम्मेवारी उपाध्यक्ष कृष्णबहादुर महरालाई दिइएको छ। जनसङ्गठन समन्वयको जिम्मा उपाध्यक्ष पम्फा भुसालले पाउँदा प्रचार विभागको इञ्चार्जको जिम्मेवारी अग्निप्रसाद सापकोटालाई दिइएको छ। विज्ञान-प्रविधि विभागको इञ्चार्जको जिम्मेवारीमा गणेश साह छन् भने बुद्धिजीवी, प्राध्यापक, मानव अधिकार, शिक्षक, तथा कानून व्यवसायी सङ्गठनको समन्वयको जिम्मेवारी दिननाथ शर्माले पाएका छन्।

यसैगरी जनवर्गीय सङ्गठनका सबै फ्य्राक्सन इञ्चार्ज पनि परिवर्तन गरिएको छ। त्यस्तै पार्टीको स्थायी समिति र केन्द्रीय सदस्यहरुको समेत जिम्मेवारी तोकिएको बताइएको छ।