पाकिस्तानका पूर्वप्रधानमन्त्री इमरान खानलाई ३ वर्षको जेल सजाय

इस्लामावादको जिल्ला तथा सत्र अदालतले पाकिस्तानका पूर्वप्रधानमन्त्री तथा तेहरिक–ए–इन्साफका अध्यक्ष इमरान खानलाई गैरकानूनी रूपमा सरकारी उपहार बेचेको अभियोगमा तीन वर्षको जेल सजाय सुनाएको छ । साथै एक लाख रुपैयाँ जरिवाना तोकेको छ ।

न्यायाधीश हुमायुन दिलावरले भ्रष्ट अभ्यासमा संलग्नता प्रमाणित भएको बताएको पाकिस्तान टिभीले जनाएको छ ।

७० वर्षीय क्रिकेटरबाट राजनीतिज्ञ बनेका उनलाई सन् २०१८ देखि २०२२ सम्म आफ्नो प्रधानमन्त्री पदको दुरुपयोग गरी विदेश भ्रमणका क्रममा प्राप्त भएका उपहारहरू र १४० मिलियन पाकिस्तानी रुपैयाँ भन्दा बढीमा राज्यको स्वामित्वमा रहेका उपहारहरू किन्न बेचेको आरोप लगाइएको थियो।

शनिबार दिउँसो १२ बजे ब्रेकपछि तेस्रो पटक तोशखाना मुद्दाको सुनुवाइ सुरु हुँदा इमरान खानका वकिल हाजिर भएनन् ।

खान सुनुवाइका लागि अदालतमा थिएनन्, तर रोयटर्स समाचार एजेन्सीले उनका वकिलले पूर्व प्रधानमन्त्रीलाई लाहोरमा गिरफ्तार गरिएको बताएका छन्।

अदालतले उनका वकिललाई १२ बजेसम्म हाजिर हुन समय दिएको थियो, त्यसपछि अदालतले आफ्नो फैसला सुनाएको हो ।

पाकिस्तान निर्वाचन आयोगका वकिल अमजद परवेजले यस अदालतले सजाय पाएपछि इमरान खानलाई पाँच वर्षसम्म निर्वाचनमा भाग लिन अयोग्य ठहरिने बताएका छन् ।

तोशखाना सरकारी विभाग हो। यहाँ प्रधानमन्त्री, राष्ट्रपति वा अन्य वरिष्ठ अधिकारीहरूले भ्रमणका क्रममा प्राप्त गरेका बहुमूल्य उपहारहरू राखिन्छन्।

कुनै पनि विदेश यात्राको समयमा परराष्ट्र मन्त्रालयका अधिकारीहरूले ती उपहारहरूको अभिलेख राख्छन् र स्वदेश फर्किएपछि तोशाखानामा जम्मा गरिन्छ।

इमरान खानले सत्तामा रहँदा आफूले पाएका उपहारहरूबारे अधिकारीहरूलाई सही जानकारी नदिएको आरोप लगाइएको थियो।

गत वर्ष अप्रिलमा पदच्युत भएपछि उनीविरुद्ध १५० भन्दा बढी मुद्दा परेका थिए । खानले कुनै गल्तीलाई अस्वीकार गर्दै आरोपहरू राजनीतिक रूपमा प्रेरित भएको बताएका छन्।

कानुनी विज्ञहरू भन्छन् कि मुद्दामा दोषी ठहरिएपछि नोभेम्बरको शुरुवातमा हुने राष्ट्रिय चुनावमा भाग लिने सम्भावना समाप्त हुन सक्छ।

खानको राजनीतिक दल, पाकिस्तान तहरीक–ए–इन्साफ (पीटीआई) ले एक विज्ञप्तिमा भनेको छ, उसले पहिले नै देशको सर्वोच्च अदालतमा अपील दायर गरिसकेको छ।