नेपालको व्यापार घाटा साढे १४ खर्बभन्दा बढी

गत आर्थिक वर्ष २०७९/८० मा नेपालले साढे १४ खर्ब रूपैयाँभन्दा बढीको व्यापार घाटा व्यहोरेको छ । भन्सार विभागले आज सार्वजनिक गरेको गत आर्थिक वर्षको वैदेशिक व्यापारसम्बन्धी विवरणअनुसार गत असार मसान्तसम्ममा नेपालले कुल १४ खर्ब ५४ अर्ब ५९ करोड १० लाख रूपैयाँ बराबरको व्यापार घाटा व्यहोरेको देखिएको हो ।

अघिल्लो वर्षको तुलनामा भने व्यापारघाटा १५ दशमलव ४५ प्रतिशतले घटेको छ । अघिल्लो आर्थिक वर्ष २०७८/७९ मा नेपालले कुल १७ खर्ब २० अर्ब ४१ करोड ७३ लाख रूपैयाँ बराबरको व्यापार घाटा व्यहोरेको थियो ।

अघिल्लो वर्षको तुलनामा गत आर्थिक वर्ष नेपालको समग्र वैदेशिक व्यापारसमेत १६ दशमलव ५८ प्रतिशतले घटेको छ । अघिल्लो आर्थिक वर्षमा २१ खर्ब २० अर्ब ४७ करोड ७३ लाख रूपैयाँ बराबरको वैदेशिक व्यापार भएकोमा गत वर्ष भने १७ खर्ब ६८ अर्ब ८७ करोड २४ लाख रूपैयाँमा सीमित भएको देखिएको हो ।

विभागको तथ्याङ्कअनुसार गत आर्थिक वर्ष मुलुकले कुल १६ खर्ब ११ अर्ब ७३ करोड १७ लाख रूपैयाँ बराबरको मालवस्तु आयात गर्दा एक खर्ब ५७ अर्ब १४ करोड छ लाख रूपैयाँ बराबरको मात्रै निर्यात गरेको छ । अघिल्लो आर्थिक वर्षको तुलनामा गत वर्ष आयात १६ दशमलव ०८ र निर्यात २१ दशमलव ४४ प्रतिशतले घटेको छ ।

गत आर्थिक वर्ष नेपालले गरेको कूल वैदेशिक व्यापारमा आयातको हिस्सा ९१ दशमलव १२ प्रतिशत र निर्यातको हिस्सा आठ दशमलव ८८ प्रतिशत बराबर छ । अर्थात् नेपालले गरेको कुल निर्यातको तुलनामा कुल आयात १० दशमलव २६ गुणाले बढी हो । गत वर्ष आयातित वस्तुबाट कुल तीन खर्ब ७७ अर्ब २६ करोड चार लाख रूपैयाँ बराबरको भन्सार राजस्व उठेको छ ।

बढी आयात हुने वस्तुमा पेट्रोलियम पदार्थ पहिलो नम्बरमा देखिएको छ । गत वर्ष नेपालले सबैभन्दा धेरै एक खर्ब ५३ अर्ब ७७ करोड रूपैयाँ बराबरको डिजेल मात्रै आयात गरेको छ । त्यस्तै, ६६ अर्ब ८४ करोड ४८ करोड रूपैयाँ बराबरको पेट्रोल र ५८ अर्ब १५ करोड ४१ लाख रूपैयाँ बराबरको खाना पकाउने ग्यास आयात भएको छ ।

फलामजन्य वस्तुको आयातमा ४३ अर्ब ६० करोड रूपैयाँ, कच्चा सोयाबिन तेल आयातमा ३५ अर्ब ५८ करोड रूपैयाँ, कोइला आयातमा २७ अर्ब १२ करोड रूपैयाँ र कच्चा पाम तेल आयातमा २५ अर्ब ९१ करोड रूपैयाँ बराबर बाहिरिएको देखिन्छ ।

बढी निर्यात भएका वस्तुमा कार्पेट पहिलो नम्बरमा छ । गत आर्थिक वर्ष नेपालले ११ अर्ब ५० करोड ६६ लाख रूपैयाँ बराबरको कार्पेट निर्यात गरेको छ । त्यस्तै, १० अर्ब ७१ करोड रूपैयाँ बराबरको प्रशोधित पाम तेल, आठ अर्ब ४७ करोड रूपैयाँ बराबरको सोयाबिन तेल र आठ अर्ब २७ करोड रूपैयाँ बराबरको अलैँची निर्यात गरेको छ ।