मिटरब्याजीसम्बन्धी पुरानै विधेयक संसदबाट पारित हुन्छ : उपप्रधानमन्त्री श्रेष्ठ
३० असार २०८० १४:१२
उपप्रधानमन्त्री तथा गृहमन्त्री नारायणकाजी श्रेष्ठले संसदमा रहेको मिटरब्याजीविरूद्धको विधेयक नै अघि बढाइने बताएका छन्।
प्रेस सेन्टर नेपाल, चितवनले आयोजना गरेको पत्रकार सम्मेलनमा उनले संसदमा रहेको विधेयकलाई नै अघि बढाउने प्रक्रियामा छलफल भइरहेको बताए।
उपप्रधानमन्त्री श्रेष्ठले भने, ‘हामीले मिटरब्याजी विरुद्धको पुरानो विधेयकलाई नै अघि बढाउन लागिरहेका छाैँ। छिट्टै विधेयक पारित गर्ने स्थितिमा सरकार पुग्छ।’
संसद अवरोधका कारण विधेयक पारित हुन नसकेको उल्लेख गर्दै उनले अब संसद सञ्चालन हुने बित्तिकै यसलाई पारित गरिने बताए।
‘प्रतिपक्षी पनि विधेयकको पक्षमा हुनुहुन्छ। यसलाई हामी चाँडै संसदबाट पारित गर्छौँ,’ उनले भने। सरकारले संसदमा दर्ता गराएको विधेयकको विषयमा दलहरूसँग छलफल भइरहेको उपप्रधानमन्त्री श्रेष्ठले बताए।
मिटरब्याजीविरूद्धको उजुरी नलिने र छानबिनका क्रममा पीडितको पक्षमा न्याय हुने काम नरोकिने उनकाे भनाइ छ।
विधेयकलाई ऐनका रुपमा लैजान मिल्दैन कि भन्ने चर्चा परिचर्चा भइरहेको उल्लेख गर्दै उनले संवेदनशील मुद्दामा विधेयक चाँडो पास गर्नुपर्ने बताए। उपप्रधानमन्त्री श्रेष्ठले भने, ‘संवेदनशील मुद्दामा कानुनी ग्याब लामो राख्न नमिल्ने भएकाले संसद् खुल्दा पारित हुने गरी काम अघि बढेको छ।’
ललिता निवास प्रकरणका सम्बन्धमा उनले भने, ‘कसलाई पहिला पक्राउ गर्ने, पहिला कस्लाई अनुसन्धान गर्ने, अभियोजन दर्ता गर्ने भनेर व्यक्ति हेरेर किटान गर्ने र प्रक्रिया अघि बढाउने गर्दैनाैँ। प्रहरीले तथ्य र प्रमाणका आधारमा अनुसन्धान गर्ने उनकाे भनाइ थियो।
‘अनुसन्धानका लागि प्रहरी संयन्त्रलाई दबाब दिन मिल्दैन र दिँदैनाैँ,’ उपप्रधानमन्त्री श्रेष्ठले भने, ‘हामीले हस्तक्षेप मुक्त भएर अनुसन्धान गरेर अपराधीलाई दायरामा ल्याउन भनेका छौँ।’
सम्बन्धित समाचार
प्रतिक्रिया