प्रधानमन्त्रीकाे राजीनामाबाट पछि हट्याे एमाले, संसदकाे अवराेध खुल्ने

प्रमुख तीन राजनीतिक दलका शीर्ष नेताहरूको बैठक सकिएको छ। शीर्ष नेताहरूको बैठकपछि बुधबारदेखि जारी प्रतिनिधिसभाको अवरोध आजदेखि हट्ने भएको छ।

प्रधानमन्त्री पुष्पकमल दाहाल ‘प्रचण्ड’को पहलमा सिंहदरबारस्थित प्रधानमन्त्री तथा मन्त्रिपरिषद् कार्यालय आज बसेको बैठकमा सङ्घीय संसदको अवरोध खुलाउन सहमति भएको प्रधानमन्त्रीको सचिवालयले जानकारी दिएको छ।

गत बुधबारदेखि प्रमुख प्रतिपक्षी नेकपा(एमाले) लगायतका दलले सङ्घीय संसदका दुवै सदनको बैठक अवरोध गर्दै आएका छन्। सदनको अवरोध खुलाउने विषयमा प्रधानमन्त्रीले प्रमुख दलका शीर्ष नेतासँग संवाद गर्न आज बिहान सत्ता गठबन्धनमा आबद्ध दलका शीर्ष नेताहरूले आग्रह गरेका थिए।

सिंहदरबारमा बसेको बैठकमा प्रधानमन्त्री प्रचण्ड, प्रमुख प्रतिपक्षी दल नेकपा (एमाले) का अध्यक्ष केपी शर्मा ओली र नेपाली कांग्रेसका सभापति शेरबहादुर देउवा थिए।

बैठकमा प्रधानमन्त्रीले संसदमा अभिव्यक्तिबारे प्रस्टकीरण दिने बताएपछि एमाले संसदकाे अवराेध हटाउन तयार भएकाे हाे। एमालेले प्रधानमन्त्रीले राजीनामा नदिएसम्म संसदकाे गतिरोध नहटाउने अडान लिएको थियो। तर, अब प्रधामन्त्रीले जवाफ दिने भएपछि एमाले अडानबाट पछि हटेको हो।

यसअघि प्रधानमन्त्री प्रचण्डको आग्रहमा सभामुख देवराज घिमिरेले आज दिउँसो १ बजेका लागि बोलाइएको प्रतिनिधिसभाको अपराह्न ३ बजेका लागि सारेका छन्।