राष्ट्रियसभामा आज पनि एमालेको अवराेध, बैठक स्थगित

राष्ट्रियसभाको आजको बैठकमा पनि नेकपा (एमाले) का सांसदहरूले अवरोध गरेपछि बैठक स्थगित भएको छ। बैठक सुरू हुनासाथ राष्ट्रियसभाका अध्यक्ष गणेशप्रसाद तिमिल्सिनाले दलका सांसद भैरवसुन्दर श्रेष्ठलाई बेल्नका लागि अनुमति दिए।

सांसद श्रेष्ठले केही दिन पहिलेको एक कार्यक्रममा प्रधानमन्त्री पुष्पकमल दाहाल ‘प्रचण्ड’ ले दिएकाे अभिव्यक्ति राष्ट्रिय हितविपरीत रहेको आरोप लगाए। उनले धानमन्त्रीको भनाइ गलत भएको तर्क गर्दै त्यसविरूद्ध विरोध गर्ने आफ्नो संसदीय दलको निर्णय भएको बताए।

सभाध्यक्ष तिमिल्सिनाले पटक-पटक एमालेका सांसदलाई आसन ग्रहण गर्न आग्रह गरे। तर, उनीहरूले उभिएर विरोध जनाइहे। सभाध्यक्ष तिमिल्सिनाले प्रधानमन्त्री पुष्पकमल दाहाल ‘प्रचण्ड’ लाई बोलाएर उनकाे धारणा सुन्ने वातावरण बनाउने र बजेटको संवेदनशीलतालाई ध्यानमा राखेर बैठक सञ्चालनका लागि आग्रह गरेका थिए।

राष्ट्रियसभाको आजको बैठकमा उद्योग वाणिज्य तथा आपूर्तिमन्त्री रमेश रिजालले ‘विद्युतीय व्यापार विधेयक, २०८०’ सभा समक्ष पेस गर्ने कार्यसूची रहेको थियाे।

त्यस्तै विनियोजन विधेयक, २०८० का विभिन्न शीर्षकमध्ये अर्थ, श्रम रोजगार तथा सामाजिक सुरक्षा, शिक्षा, विज्ञान तथा प्रविधि, कानून, न्याय तथा संसदीय मामिला र कृषि तथा पशुपक्षी विकास मन्त्रालयमाथि छलफल हुने कार्यसूची तय गरिएको थियाे।

राष्ट्रियसभाको अर्को बैठक यही असार २२ गते शुक्रबार १२:२९ बजे बस्नेछ।