पशुपति क्षेत्रमा साउन महिनाको तयारी सुरू

पशुपति क्षेत्र विकास कोषले साउन महिनामा पशुपतिनाथको दर्शन गर्न आउने भक्तजनका लागि सहज रूपमा दर्शन गराउन तयारी सुरू गरेको छ।

साउन महिना भगवान् शिवको महिना भएकाले विश्वभरबाट लाखौं भक्तजन पशुपति क्षेत्रमा पूजा आराधना एवं दर्शनका लागि आउने गर्छन्। देश एवं विदेशबाट आउने भक्तजनलाई सहज रूपमा दर्शन गराउन तयारी सुरू गरिएको कोषका कार्यकारी निर्देशक डा. घनश्याम खतिवडाले जानकारी दिए।

यस वर्ष साउनमा अधिकमास परे पनि प्रत्येक वर्ष साउनमा गरिने भगवान् पशुपतिनाथको नित्य एवं नैमित्तिक पूजामा कुनै प्रभाव नपर्ने उनले बताए। भगवान् शिव व्यष्टि र समष्टि दुवैका देवता भएकाले अधिकमासले भगवान् शिवको नित्य पूजामा फरक नपर्ने कोषले जनाएको छ। अपव्यय सबै शिवले नै लिने भएकाले पनि साउनमा गरिने शिवको पूजा अधिकमासका कारण नरोकिने जनाइएको छ।

साउनको पनि सोमबारका दिन पशुपति क्षेत्रमा लाखौं भक्तजनको भीड लाग्ने गर्छ ।