मन्त्री मोदीसँग नवनियुक्त कोरियाली राजदूतको शिष्टाचार भेट
आफ्नो कार्यकालमा द्विपक्षीय सम्बन्ध र सहयोग थप प्रगाढ र सुदृढ बनाउन लागिपर्ने राजदूतकाे प्रतिबद्धता
१२ असार २०८० १५:३३
सङ्घीय मामिला तथा सामान्य प्रशासनमन्त्री अमनलाल मोदीसँग नेपालका लागि गणतन्त्र कोरियाका नवनियुक्त राजदूत पार्क टियोङले शिष्टाचार भेट गरेका छन्।
मन्त्री मोदीलाई भेट्न राजदूत टियोङ आज मन्त्रालय पुगेका थिए। सो भेटमा मन्त्री मोदीले नवनियुक्त राजदूत टियोङलाई कार्यकाल सफलताको शुभकामना व्यक्त गरे।
भेटमा मन्त्री मोदीले कोरिया र नेपालबीचको सम्बन्ध मैत्रीपूर्ण रहिआएको बताउँदै यस सम्बन्धलाई थप सुदृढ बनाउन नेपालका विभिन्न स्थानीय तह र दक्षिण कोरियाका शहरबीच भगिनी सम्बन्ध स्थापना गर्न इच्छुक रहेको बताए।
भेटमा राजदूत टियोङले नेपाल र कोरियाबीचको जनस्तरको सम्बन्धको चर्चा गर्दै आफ्नो कार्यकालमा द्विपक्षीय सम्बन्ध र सहयोग थप प्रगाढ र सुदृढ बनाउन लागिपर्ने बताए।
त्यस अवसरमा राजदूत टियोङले मन्त्री मोदीको कोरिया भ्रमणको सफलताको कामना गरे। मन्त्री मोदी कोरियाको दोस्रो ठूलो शहर बुसानमा यही असार २० गतेबाट आयोजना हुन लागेको मन्त्रीस्तरीय एक बैठकमा सहभागी हुन त्यसतर्फ जाँदै छन्।
प्रतिक्रिया