विवाहका लागि टिकोटालो गरेर फर्कदै गरेको जीप दुर्घटना, पाँचजनाको मृत्यु
८ असार २०८० ७:१९
गोरखामा बेहुलीको घरमा गएर टिकाटालो गरेर फर्किंदै गरेको जीप दुर्घटना हुँदा पाँच जनाको मृत्यु भएको छ ।
मृत्यु हुनेमा चार पुरुष र एक महिला रहेका छन् । दुर्घटनामा परी १२ जना घाइते भएको गोरखाका प्रहरी नायव उपरीक्षक लिलाराज लामिछानेले जानकारी दिए ।
सहिद लखन गाउँपालिका–३ चिलिङकोटबाट बेहुली लिएर सहिद लखन–५ ताक्लुङ फर्किँदै गरेको ०१–०२३ च ४४२७ नम्बरको जिप गए राति दुर्घटनामा परेको हो ।
प्रमुख जिल्ला अधिकारी दिनेशसागर भुसालका अनुसार प्रहरीले दिएको जानकारी अनुसार पाँच जनाको मृत्यु भएको भनेर पुष्टि गरेको छ। उनले बिहान ५ बजेको अपडेट अनुसार प्रहरीले पाँच जनाको शव भेटेको हो ।
शहीद लखन गाउँपालिका–५ ताक्लुङबाट शहीद लखन ३ चिलिङकोटस्थित बेहुलीको घरमा गएर टिकाटालो गरेर फर्किंदै गरेको जीप गएराति दुर्घटना भएको हो ।
बेहुला पक्षका तीनवटा गाडी चढेर टीकाटालो गर्न गएका थिए । तीनवटा गाडीहरुमध्ये एउटा गाडी गएराति १ बजेतिर दुर्घटना भएको हो । बेहुलीको घरदेखि करिब तीन–चार सय मिटर पर गाडी दुर्घटना भएको हो । गाडीमा एकदर्जनबढी यात्रु रहेको खुलेको छ ।
जिल्ला प्रहरी कार्यालय गोरखाका अनुसार उक्त जिप सडकबाट करिब २ सय मिटर तल खसेको छ । दुर्घटनास्थलमा खोज तथा उद्धार जारी छ । उद्धार कार्यमा नेपाल प्रहरी, सशस्त्र प्रहरी र विपद व्यवस्थापन समितिको टोली खटिएका छन् ।
कच्ची बाटो, भिरालो स्थान र रातभर पानी परेकाले उद्धारमा कठिनाइ भएको प्रहरीले जनाएको छ ।
प्रतिक्रिया