समाजवादी मोर्चामा सहभागी हुने एकीकृत समाजवादीको निर्णय

सत्तारूढ दल नेकपा (एकीकृत समाजवादी) ले चाँडै घोषणा हुन लागेको समाजवादी मोर्चामा सहभागी हुने निर्णय गरेको छ।

शुक्रबार बिहान बसेको पार्टीको सचिवालय बैठकले मोर्चामा सहभागी हुने निर्णय गरेको प्रचार विभाग प्रमुख जगन्नाथ खतिवडाले जानकारी दिए।

बैठकमा पार्टी अध्यक्ष माधवकुमार नेपालले मोर्चा आजै घोषणा हुने भनिए पनि दलहरूका आ-आफ्ना तयारी बाँकी नै रहेकाले अझै केही दिन लाग्न सक्ने ब्रिफिङ गरेका थिए।

एकीकृत समाजवादीका तर्फबाट सबै तयारी भए पनि केही पार्टीहरूमा तयारी नपुगेकाले मोर्चा घोषणामा केही ढिलाइ हुन पुगेको खतिवडाले बताए।

मोर्चामा एकीकृत समाजवादीसहित नेकपा (माओवादी केन्द्र), जनता समाजवादी पार्टी (जसपा), नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टी, वामदेव गाैतम नेतृत्वको नेकपा एकता अभियानलाई समेत सहभागी गराउने तयारी छ।