५१ वटा ट्र्याक्टरमा जन्ती, बेहुला आफैं पनि चालक बनेर पुगे बेहुलीको घर

राजस्थानको बारमेरमा एक जना किसानले आफ्नो छोराको विवाह अनौठो ढङ्गले गराएका छन् । दुलहीको घरमा खेत खनजोतमा प्रयोग हुने ट्र्याक्टरको ताँती लगाएर ती किसानले छोराको धुमधामसँग बिहे गराएका हुन् ।

आफ्नो लगनगाँठो कस्न जाँदा फगत एउटा ट्र्याक्टर लिएर गएका ती किसानले बुहारी लिन जाँदा भने ५१ वटा ट्र्रयाक्टरको जुलुस गराएका छन् । सोमबार बिहान बेहुला प्रकाश चौधरीको घरबाट ५१ किलोमिटर टाढा रहेको रोली गाउँतर्फ दुलही लिन गएको टोली देखेर गाउँभरका मानिस अचम्म मानेर हेरिरहेका थिए । अझ आश्चर्यको कुरा के भने दुलहा आफैँले ट्र्याक्टर चलाएका थिए । उनका पछिपछि ५० वटा ट्र्याक्टरको ताँती थियो । ट्र्याक्टरमा दुई सय जनाभन्दा बढी जन्ती थिए ।

‘मेरो विवाहमा जम्मा एउटा ट्याक्टर थियो, मैले छोराको लागि ५१ वटा ल्याएँ,’ आफ्नो परिवारको मुख्य पेशा कृषि भएकाले किसानको पहिचान ट्र्याक्टर चलाएर बुहारी लिन छोरालाई निर्देशन दिएको स्पष्ट पार्दै दुलहा प्रकाशका बुवाले भने ।

बाबुको निर्देशनअनुसार आफूले ट्र्याक्टर चलाएको र किसानको छोरालाई दुलही लिन जाँदा अन्य सवारी साधन चढ्नुपर्छ भन्ने नलागेको उनले बताए । शेरवानीमा सजिएका उनले रवाफिलो विवाह नरुचाएको एनएनआईसँगको कुराकानीमा बताए ।

कन्या पक्षका मानिससहित दुलहा स्वयंले ट्र्याक्टर लिएर आएको खबर दुलही ममताको गाउँमा फैलिएपछि आश्चर्यचकित धेरै गाउँले प्रकाश र ट्र्याक्टरमा आएका उनका जन्तीलाई हेर्न धुइरिएका थिए । प्रकाशका पितासँग ३० वटा ट्र्याक्टर भएकाले जन्ती जान अरू सवारी साधनको जोहो नगर्ने बरु छिमेकी किसानका ट्र्याक्टर पनि माग्ने निर्णय गरेर थप २१ वटा ट्र्याक्टरमा जन्ती व्यवस्थापन गरिएको उनले बताएका छन् ।