लेखकहरूले पाउने पुरस्कारमा राज्यले कर लगाउन हुँदैन : बैरागी काँइला
३० जेठ २०८० १४:४०
कवि एवं नेपाल प्रज्ञा-प्रतिष्ठानका पूर्वकुलपति बैरागी काँइला (तिलविक्रम नेम्वाङ सुब्बा) ले लेखकहरूले पाउने पुरस्कार रकममा राज्यले कर लगाउन नहुने बताएका छन्।
मंगलबार गोरखापत्र संस्थानले प्रकाशन गर्ने मधुपर्कको ५६ औं वार्षिकोत्सव कार्यक्रममा बोल्दै पूर्वकुलपति काँइलाले यस्तो बताएका हुन्।
उनले लेखकले लेख लेखेर पाउने पारिश्रमिक र लेखेर योगदान दिएबापत पाउने सम्मानको रकम र पुरस्कारमा भिन्नता रहेको भन्दै पुरस्कारमा कर लगाउनु उचित नभएको बताए। उनले पारिश्रमिक नियमित हुने भएको भन्दै पारिश्रमिकलाई ऐनबमोजिमको कर लगाउनु राम्रो भएको बताए।
उनले लेखकले ५० वर्षपछि एक पटक पाउने पुरस्कारमा आयकर काटेर पुरुस्कार दिन नहुने बताए। उनले सरकारले आयकर नियमित आम्दानीमा लगाउनुपर्ने भन्दै पुरस्कारमा कर लगाउन नहुने जिकिर गरे।
उनले अहिलेसम्म आफूले पाएको पुरस्कारमा तोकेबमोजिम नै पुरस्कार पाएको भन्दै पुरस्कार दिने संस्थानहरूले अब विचार गर्नुपर्ने बताए। उनले घोषणा भएबमोजिमको पुरस्कार पाउनुपर्ने बताए।
उनले अब सरकारलाई लेखकहरूले कर १५ वा २५ प्रतिशत कति तिर्नुपर्ने हो भन्दै प्रश्न गरे। उनले लेखकले लेखेको लेख कुनै पत्रिकाले छाप्यो भने ३ सय रुपैयाँ दिनुपर्नेमा १५ वा २५ प्रतिशत कर काट्ने गरेको बताए।
उनले यो अवस्थाबाट आम नेपाली लेखकहरू पीडित रहेको बताए। उनले नेपाली लेखकहरूले लेखेर ठूलो रकम पाउन सकिन्न भन्ने थाहा पाएर कतै गुनासो नगरेको बताए।
मधुपर्कको ५६ औं वार्षिकोत्सवको अवसरमा मधुपर्क सम्मान तथा मधुपर्क प्रतिभा सम्मान वरिष्ठ कवि कृष्णभक्त श्रेष्ठ, वरिष्ठ आख्यानकार पुष्कर लोहनी र छन्द कवि प्रभा भट्टराईलाई सम्मान गरिएको छ। गोरखापत्र संस्थानको मासिक प्रकाशन मधुपर्कले विगत २२ वर्षदेखि हरेक वर्ष स्रष्टाहरूलाई सम्मान प्रदान गर्दै आएको छ।
मधुपर्क सम्मान, २०८० (पद्य) वरिष्ठ कवि कृष्णभक्त श्रेष्ठ र मधुपर्क सम्मान, २०८० (गद्य) वरिष्ठ आख्यानकार एवं समालोचक पुष्कर लोहनीलाई प्रदान गरिएको छ।
सम्बन्धित समाचार
प्रतिक्रिया