अर्थतन्त्र चलायमान बनाउने गरी बजेट आएको छ : अर्थमन्त्री महत

अर्थमन्त्री डा. प्रकाशशरण महतले मुलुकको अर्थतन्त्र चलायमान बनाउने ढंगले बजेट निर्माण भएको बताएका छन्।

नेपाली कांग्रेस काठमाडौं क्षेत्र नं. ५ ले आज बिहान काठमाडाैंमा आयोजना गरेको क्षेत्रीय सम्मेलनमा उनले देश र जनतालाई केन्द्रबिन्दुमा राखेर अर्थतन्त्रलाई चलायमान बनाउने ढंगले बजेट निर्माण भएको दाबी गरेका हुन्।

‘केही समूहलाई बजेटबारे चित्त बुझेको छैन। दृढ अठोटका साथ कुनै स्वार्थ समूहको कुरा नसुनी बजेट निर्माण गरेका हौं। बजेटले अर्थतन्त्रलाई चलायमान बनाउन मद्दत पुग्छ। बजेटले सबै क्षेत्रलाई समेटेको छ,’ उनले भने। निरपेक्ष भावका साथ बजेट निर्माण गरिएको उनको भनाइ छ।

अर्थमन्त्री डा. महतले आफ्नो अठोट देश र जनताप्रति भएको स्पष्ट पारे। ‘हाम्रा आकांक्षाहरू धेरै छन् तर स्रोत र साधन सीमित छन्। भएका स्रोत साधनलाई उच्चतम प्रयोग गरी अर्थतन्त्रलाई चलायमान बनाउन लाग्नुपर्छ’, उनले भने।

नेपाली कांग्रेसका प्रवक्तासमेत रहेका डा. महतले पार्टीभित्र अनुशासन जरुरी रहेको बताए। पार्टीभित्र एकअर्काप्रति आदर र सम्मान गर्ने परिपाटी राख्नुपर्ने उनको भनाइ थियो।

उनले कांग्रेस बलियो भए कुनै राजनीतिक दल र शक्तिसँग समन्वय र गठबन्धन गर्न नपर्ने बताए। पार्टीभित्र छलफल गरी निष्कर्ष निकालेर बाहिर एक स्वरका साथ जानुपर्ने उनको भनाइ छ । व्यक्ति पार्टीभन्दा ठूलो बन्न नसक्ने डा महतले बताए ।