राष्ट्रपति पौडेलसँग स्विटजरल्याण्डकी राजदूतको बिदाइ भेट

राष्ट्रपति रामचन्द्र पौडेलसँग स्विटजरल्याण्डकी राजदूत एलिजाबेथ भोन क्यापलरले आज बिदाइ भेट गरेकी छन्। राजदूत क्यापलरले आफ्नो साढे पाँच वर्षे कार्यकाल सकेर स्वदेश फर्कनुअघि राष्ट्रपति पौडेलसँग भेट गरेकी हुन्।

राष्ट्रपति भवन शीतल निवासमा भएको सो भेटमा राष्ट्रपति पौडेलले स्विस सरकारले नेपालको विकास र नेपालीप्रति देखाएको सद्भाव उदाहरणीय रहेको बताएको उनका परराष्ट्र विज्ञ डा. सुरेशचन्द्र चालिसेले बताए। सो अवसरमा राष्ट्रपति पौडेलले दुई देशबीचको सम्बन्ध आगामी दिनमा अझै प्रगाढ हुँदै जाने विश्वाससमेत व्यक्त गरे।

राजदूत क्यापलरले आफ्नो कार्यकालमा दुई देशबीचको सम्बन्ध प्रगाढ र बलियो बनाउन खेल्नुभएको योगदानको समेत राष्ट्रपति पौडेलले सो अवसरमा प्रशंसा गरेका थिए।

दुई मुलुकबीच कूटनीतिक सम्बन्ध स्थापना भएपश्चात द्विपक्षीय सम्बन्ध सुमधुर, नजिकको र मित्रवत रहिआएको छ। नेपालले स्विटजरल्याण्डसँगको सम्बन्धलाई आपसी सम्मान, मित्रता र सहयोगका आधारमा उच्च महत्त्व दिँदै आएको छ।