बजेटले राष्ट्रको अठोट पूरा गर्ने लक्ष्य बोकेको छ : सांसद घर्ती
२५ जेठ २०८० १३:२२
नेकपा (माओवादी केन्द्र) का सांसद पूर्णबहादुर घर्तीले आर्थिक वर्ष २०८०/८१ को बजेटले राष्ट्रको अठोट पूरा गर्ने लक्ष्य बोकेको दाबी गरेका छन्।
बिहीबारको प्रतिनिधिसभाको बैठकमा आगामी आवको राजस्व र व्ययको वार्षिक अनुमानमाथिको सामान्य छलफलमा भाग लिँदै उनले बजेटको प्रभावकारी कार्यान्वयमा जोड दिए।
उनले बजेटमा राज्यलाई अपरिहार्य नभएका २० समिति, संस्थान खारेज गर्ने वा गाभ्ने व्यवस्था कार्यान्वयन सहज नभएको र यसमा चुनौती रहेकाले सरकारले विशेष ध्यान दिनुपर्ने बताए।
सांसद घर्तीले प्रभावकारी नेता र मन्त्रीका निर्वाचन क्षेत्रमा बजेटले प्राथमिकता दिने पुरानै प्रवृति देखिएको टिप्पणी गरे।
साथै उनले मलुकको आवश्यकतालाई ध्यान दिई व्यावसायिक उत्पादनमा जोड दिनुपर्ने सुझाव दिए।
उनले किसानले समयमा मल बीउ नपाउने पुरानै अवस्था कायम हुनु दूर्भाग्य भएको बताए।
हालको प्रतिनिधिसभामा नयाँ र पुराना जनप्रतिनिधि रहे पनि यस थलोमा जीवन व्यवहार भने नयाँ हुन नसकेको उनको भनाइ थियो।
घर्तीले सबै दलले जनतामा छाएको निराशा हटाइ आशा जगाउनुपर्ने धारणा व्यक्त गरे।
प्रतिक्रिया