संसद ‘रेस्लिङ क्लब’ जस्तो भएको छ : ज्ञानेन्द्र शाही

राष्ट्रिय प्रजातन्त्र पार्टी (राप्रपा) नेता एवं सांसद ज्ञानबहादुर शाहीले आफ्नो दलले भ्रष्टाचारविरुद्धको अभियान चलाउने बताएका छन्।

प्रतिनिधिसभाको आजको बैठकमा सरकारले प्रस्तुत गरेको आगामी आर्थिक वर्ष २०८०/८१ को नीति तथा कार्यक्रममाथिको छलफलका क्रममा सांसद शाहीले राप्रपाले रचनात्मक ढङ्गले संसद् र सडकबाट भ्रष्टाचारविरुद्धको अभियान चलाउने बताएका हुन्।

‘सरकारले भ्रष्टाचारी र अपराधीलाई कारबाही गरोस्, हामीले भ्रष्टाचारविरुद्ध अभियान नै चालउँछौं,’ उनले भने। उनले संसदमा पक्ष र विपक्ष मात्रै भएर समस्याको समाधान नहुने भन्दै संसद्को प्रभावकारितामाथि प्रश्न उठाए।

‘संसद रेस्लिङ क्लबजस्तो भएको छ। यताकाले उता गाली गर्ने उताकाले यता गाली गर्ने काम मात्रै भयो। अहिले संसद् चलाउन दैनिक करिब १० लाख रुपैयाँ खर्च हुन्छ,’ उनले भने।

‘हामीलाई यहाँ अनर्गल गफ गर्नका लागि जनताले निर्वाचित गराएको होइन,’ उनले थपे, ‘ठूलाबडालाई कानून नलाग्ने र सर्वसाधारण नागरिकका लागि मात्रै कानून लाग्ने अवस्थाको अन्त्य गरियोस्।’ नक्कली भुटानी शरणार्थी प्रकरणमा गम्भीर रूपमा छानबिन हुन नसकेको उनको दाबी छ।

शिक्षा र स्वास्थ्य क्षेत्रमा व्यावसायीकरण र राजनीतिकरण हुँदा त्यसले साक्षर व्यक्ति उत्पादन गरे पनि शिक्षित व्यक्ति उत्पादन गर्न नसकेको उनको भनाइ छ।

जनप्रतिनिधिले शिक्षा र स्वास्थ्य क्षेत्रमा लगानी गर्न नपाउने व्यवस्था हुनुपर्ने उनको माग छ। उनले नेपालको अहिलेको शिक्षा पद्धति परिवर्तन हुनुपर्ने बताए।

नेपाली नागरिक बिदेसिनबाट रोक्ने गरी सरकारको नीति तथा कार्यक्रम ल्याउन नसकेको शाहीले टिप्पणी गरे।