प्रधानमन्त्रीकाे भारत भ्रमणलगत्तै बीआरआईमा थप सहयोग जुटाउन दुई मन्त्री चीन जाने
७ जेठ २०८० ११:१५
प्रधानमन्त्री पुष्पकमल दाहाल ‘प्रचण्ड’को भारत भ्रमणलगत्तै चीनको निमन्त्रणामा सरकारमा नेकपा (एकीकृत समाजवादी) बाट प्रतिनिधित्व गरिरहेका दुई मन्त्री चीन जाने तयारी भइरहेको छ ।
परराष्ट्र मन्त्रालय स्रोतका अनुसार चीन सरकारको निमन्त्रणामा कृषि तथा पशुपन्छी विकासमन्त्री डा. वेदुराम भुसाल र भौतिक पूर्वाधार तथा यातायातमन्त्री प्रकाश ज्वाला चीन जाने तयारी भइरहेको हो । उनीहरू दुवै जेठ महिनाभित्र चीन भ्रमणमा जाने गरी आवश्यक तयारी भइरहेको हो ।
यसअघि घोषित कृषिसम्बन्धी विभिन्न परियोजनामा चीनको सहयोग उपलब्ध गराउन कृषिमन्त्री डा. भुसाललाई चीनबाट भ्रमणको निम्तो आएको हो । प्रधानमन्त्रीको भारत भ्रमणछि जेठ महिनाभित्र मन्त्री चीन जाने गरी तयारी थालिएको हो ।
यस्तै रसुवागढी जाने सडक स्तरोन्नतिबारे थप छलफल गर्न भौतिक पूर्वाधार तथा यातायातमन्त्री ज्वालालाई पनि चीनले निम्तो दिएको हो । भ्रमणको क्रममा चीनको बेल्ट एण्ड रोड इनिसिएटिभ (बीआरआई) अन्तर्गत नेपाललाई थप सहयोग गर्नेबारे छलफल हुने र भ्रमणमा भौतिक सहयोगका नयाँ क्षेत्र पहिल्याइने बताइएको छ ।
मन्त्री भुसाल र ज्वालाको औपचारिक भ्रमणका सम्बन्धमा केही दिनमै परराष्ट्र मन्त्रालयले जानकारी गराउने भएको छ ।
सम्बन्धित समाचार
प्रतिक्रिया