प्रविधिको प्रयोगबाट गरिने अपराध आजको मुख्य चुनौती : आईजीपी कुँवर

नेपाल प्रहरीका महानिरीक्षक (आईजीपी) वसन्तबहादुर कुँवरले समाज विकाससँगै अपराधको मोडल पनि फेरिँदै गएको बताएका छन्। उनले प्रविधिको प्रयोगबाट गरिने अपराध आजको मुख्य चुनौती रहेको बताए।

इलाका प्रहरी कार्यलय बुटवलको नवनिर्मित भवनको आज उद्घाटन कार्यक्रममा उनले प्रविधिले सिर्जना गरेको आपराधिक चुनौतीको नियन्त्रण सामना गर्न नेपाल प्रहरी पनि सोहीअनुसार अग्रसर भएर काम गरिरहेको बताए।

आईजीपी कुँवरले प्रहरी सीमान्तकृत र निम्नवर्गीय नागरिकको साथी बनेर काम गर्ने गरी अगाडि बढिरहेको बताए। ‘नेपाल प्रहरीले जनताको विश्वास जित्ने गरी काम गर्नुपर्छ। त्यसका लागि प्रहरी संगठन प्रतिबद्ध छ,’ उनले भने, ‘जनताको जीउधनको रक्षा र मावन अधिकारको संरक्षण गर्दै सर्वसाधारण नागरिकको जनजीवनलाई सरल, सहज र सुरक्षित गराउने दायित्व पूरा गर्न हामी प्रतिबद्ध छौं।’

उनले देशैभरका प्रहरी कार्यालयमा नागरिक सहायता कक्षलाई व्यवस्थित बनाउने उल्लेख गर्दै स्थानीय सरकारको समन्वयमा लागुऔषध नियन्त्रणको विशेष कार्यक्रम चलाइने बताए। उनले प्रहरीको कार्यदक्षता वृद्धिका लागि भौतिक पूर्वाधारको सम्पन्नतामा पनि ध्यान दिइएको बताए।

सो अवसरमा बुटवल उपमहानगरपालिकाका प्रमुख खेलराज पाण्डेले व्यावसायिक क्षेत्रको संरक्षण, दुर्व्यसन न्यूनीकरण र अनुचित दबाब दिने कामको नियन्त्रणमा प्रहरीको सहयोग जरुरी रहेको बताए। कार्यक्रममा प्रहरी नायब महानिरीक्षक (डिीआईजी) उमेशराज जोशीले लुम्बिनी प्रदेशको शान्तिसुरक्षा र अपराध नियन्त्रणमा नेपाल प्रहरीले अग्रपंक्तिमा रहेर काम गरिरहेको बताए।

इलाका प्रहरी कार्यालय बुटवलको परिसरमा संघीय सरकारमार्फत प्राप्त दुई करोड ४१ लाख २० हजार रुपैयाँको लागतमा नागरिक सहायता कक्ष र मेस निर्माण भएको छ भने लुम्बिनी प्रदेश सरकारबाट प्राप्त तीन करोड १९ लाख १३ हजार रुपैयाँमा प्रहरी ब्यारेक र कार्यालय प्रमुखको निवास निर्माण भएको इलाका प्रहरी कार्यालय बुटवलका प्रहरी उपरीक्षक दानबहादुर थापाले जानकारी दिए।