महाकाली करिडोरको ट्र्याक खोल्ने कामले अब गति लिन्छ : रमेश लेखक

नेपाली कांग्रेसका प्रमुख सचेतक एवं पूर्वमन्त्री रमेश लेखकले महाकाली करिडोरको ट्र्याक खुलाउने कार्यले अब गति पाउने बताएका छन्।

कञ्चनपुर निर्वाचन क्षेत्र नं. ३ बाट निर्वाचित सांसदसमेत रहेका कांग्रेस नेता लेखकले विगतमा सरकारको उदादीनताका कारण निर्माणमा ढिलाइ भएको बताउँदै अब डेढ वर्षभित्र करिडोरको ट्र्याक खुलिसक्ने दाबी गरे।

करिडोरको शून्य बिन्दु कञ्चनपुरको व्रह्मदेव क्षेत्रको खल्ला मसेट्टीमा आइतबार स्थलगत अनुगमन गर्ने क्रममा उनले रुख कटान अनुमतिकै कारण योजनाको काम विगतमा प्रभावित रहेको बताए। अहिलेको सरकारले कञ्चनपुरदेखि दार्चुलासम्म नै करिडोरको ट्र्याक खुलाउन रुख कटान लगायत अरू कामको अनुमति दिइसकेको अवस्था रहेको भन्दै नेता लेखकले कञ्चनपुरबाट आउँदो दशैंमा डडेल्धुराको जोगबूढा क्षेत्रमा यही ट्र्याकबाट पुग्ने बताए।

करिडोरको शून्य बिन्दुदेखि १५ किलोमिटर ट्र्याक खुलाउने काम ठेक्का सम्झौता भएको डेढ वर्ष बितिसक्दा पनि रुख कटानको अनुमति नहुँदा अलपत्र थियो। नेता लेखककै पहलमा रुख कटान अनुमतिलगायत यहाँका ठूला विकास निर्माण आयोजनाको विषयमा प्रधानमन्त्री पुष्पकमल दाहालसमक्ष आग्रह भएको थियो।

करिडोरको ट्र्याक खुलेलगत्तै सडक कालोपत्रे गर्ने चरणमा जाने बताए। उनले बैतडी, दार्चुलालगायतका जिल्लामा पनि करिडोरको निर्माणको उल्झन हटिसकेको बताउँदै आयोजनाका लागि बजेटको कमी नहुने बताए।

यसैगरी महाकाली करिडोर आयोजनाका प्रमुख लक्ष्मणदत्त जोशीले वन कार्यालयले रुखमा टाँचा लगाउन सुरु गरेसँगै काम अगाडि बढेको बताए। उनका अनुसार नेपाल-भारत र चीनसँग जोड्ने र त्रिदेशीय नाकाका रूपमा विकास गर्ने अवधारणाका साथ अघि बढेको करिडोरको ६० प्रतिशत ट्र्याक खुलेको छ।

करिडोरअन्तर्गत ४२५ किलोमिटर ट्र्याकमध्ये केही भाग (दार्चुलामा) नेपाली सेनाले ट्र्याक खोलिरहेको छ। करिडोरको अनुगमनमा प्रमुख सचेतक लेखकसँगै सुदूरपश्चिम प्रदेशसभा सदस्य बेलबहादुर राना र मधु भारती, जिल्ला समन्वय समिति कञ्चनपुरका प्रमुख दुर्गादत्त बोहरालगायतको सहभागिता थियो।