भन्सार अधिकारीहरूलाई अर्थमन्त्री महतको निर्देशन- नतिजा दिने गरी काम गर्नुस्

अर्थमन्त्री डा. प्रकाशशरण महतले कर्तव्यनिष्ठ भएर काम गर्न र नतिजा देखाउन भन्सारका अधिकारीहरूलाई निर्देशन दिएका छन्। भन्सार विभागद्वारा आज काठमाडौंमा आयोजित भन्सार व्यवस्थापन गोष्ठीलाई सम्बोधन गर्दै उनले आफ्नो जिम्मेवारीलाई उच्च प्राथमिकता दिन निर्देशन दिएका हुन्।

‘आयात निर्यातमा संलग्न व्यवसायीलाई अनावश्यक दुःख दिने भनेको होइन, जायज कुराहरू के हुन् तपाईंहरूलाई नै थाहा छ, तर कार्यान्वयन भइरहेको छैन, म यहाँहरूलाई त्यतातर्फ ध्यानाकर्षण गराउन चाहन्छु।’

आफ्नो नेतृत्वमा अर्थ मन्त्रालय पारदर्शी ढंगबाट काम गर्न लागिपरेको उल्लेख गर्दै उनले जिम्मेवार पदाधिकारीलाई गम्भीर भएर काम गर्न निर्देशित गरे।

‘जवाफदेही र जिम्मेवार बनाउने परम्पराको हामी सुरुआत गरौं,’ उनले भने। धेरै कारणबाट राजस्व घटेको र राजस्व घट्नुमा भन्सारको सम्पूर्ण दोष नरहेको भन्दै उनले राजस्व चुहावट रोक्न सुरक्षा निकायसँग पनि गम्भीर छलफल गरिएको बताए। उनले दुवै सुरक्षा निकाय र भन्सार कर्मचारीको समन्वयमा निगरानी गर्न आग्रह गरे।

‘धेरै भन्सार नाकाबाट राजस्व संकलन घटेको छ। ती नाकाबाट पनि राजस्व चुहावट भएको खबर छ। भैरहवा, वीरगञ्ज, रसुवा नाकामा पनि त्यस्तै अवस्था छ। यसलाई गम्भीर ढंगबाट लिनुहोला,’ मन्त्री महतले भने।

साधारण खर्च धान्न नसक्ने गरी आय घट्नु दुर्भाग्यपूर्ण भएको उल्लेख गर्दै उनले अहिलेको अवस्थालाई राजनीतिक नेतृत्वले उच्च महत्व दिएको बताए। उनले भने, ‘राजनीतिक नेतृत्व यसमा गम्भीर छ। यो गम्भीरतालाई मध्यनजर राखेर जहाँजहाँ समस्या छन् ती समस्यालाई समाधान गर्न हाम्रोतर्फबाट कुनै कसर बाँकी राखिने छैन।’

उद्योगी व्यवयायीलाई अनावश्यक झन्झट, पीरमर्का परिरहेकाप्रति आफूहरू संवेदनशील रहेको भन्दै मन्त्री डा. महतले यस विषयमा भन्सारका अधिकारीहरूले पनि ध्यान दिनुपर्ने बताए।