वायुसेवा निगम व्यवस्थापकीय सुधार अध्ययन समिति गठन

नेपाल वायुसेवा निगमको संरचनागत तथा व्यवस्थापकीय पक्षको अध्ययन गरी सुझाव पेस गर्न पाँच सदस्यीय अध्ययन समिति गठन भएको छ । पूर्वगभर्नर दीपेन्द्रबहादुर क्षेत्रीको नेतृत्वमा पाँच सदस्यीय समिति गठन भएको हो ।

समितिमा क्याप्टेन ओम गुरुङ, सञ्चारकर्मी टिकाराम राई, वरिष्ठ चार्टर्ड एकाउन्टेन्ट पियुस आनन्द र सहारा न्यौपाने सदस्य रहेका छन् ।

यस समितिले निगम भित्रको समस्या, व्यथित र अवस्था सुधारको सम्भावनाको खोजी गरी सोको प्रतिवेदन संस्कृति पर्यटन तथा नागरिक उड्डयन मन्त्रालयलाई बुझाउने छ ।

यस्तै निगमको व्यवस्थापकीय पक्ष सुधार गर्न कस्तो व्यवस्थापन आवश्यक पर्ने हो ? पुनर्संरचना कसरी गर्नुपर्ने हो ?लगायतका ८ वटा विषयमा समितिले अध्ययन गर्ने मन्त्री सुदन किरातीले जानकारी दिए ।

पटकपटक समिति बन्ने, प्रतिवेदन पेश गर्ने तर निगमको स्थितिमा भने खासै सुधार आउन सकेको छैन । प्राप्त स्रोत साधन र सम्भावना हुँदाहुँदै पनि निगमले सक्षम बनेर निजी हवाई कम्पनीसँग प्रतिस्पर्धा गर्न सकिरहेको छैन ।

राष्ट्रिय ध्वजवाहक नेपाल वायुसेवा निगम अहिले पनि झण्डै ५० अर्ब रुपैयाँ बराबरको ऋणमा डुबेको छ । यसैको सुधारका लागि मन्त्री किरातीको सक्रियतामा निगमको संरचनागत तथा व्यवस्थापकीय सुधार अध्ययन समिति गठन भएको हो ।