सुनको मूल्य हालसम्मकै उच्च

सुनचाँदी बजारमा सुनको मूल्यले नयाँ रेकर्ड बनाएको छ । आज नेपाली बजारमा छापावाल सुनको मूल्य प्रतितोला एक लाख ११ हजार रुपैयाँ पुगेर हालसम्मकै उच्च भएको छ ।

अघिल्लो दिन प्रतितोला एक लाख नौ हजार रुपैयाँमा कारोबार भएको उक्त सुनको मूल्य आज प्रतितोला दुई हजार रुपैयाँले बढेको नेपाल सुनचाँदी व्यवसायी महासंघले सार्वजनिक गरेको विवरणमा उल्लेख छ । यसअघि यही चैत ५ गते उक्त सुनको मूल्य उच्च रहँदै प्रतितोला एक लाख १० हजार रुपैयाँ पुगेको थियो ।

त्यस्तै आज तेजाबी सुनको मूल्य प्रतितोला एक लाख १० हजार चार सय ५० रुपैयाँ छ । उक्त सुन अघिल्लो दिन एक लाख आठ हजार पाँच सय रुपैयाँमा कारोबार भएको थियो ।

त्यस्तै आज चाँदीको मूल्य अघिल्लो कारोबार मूल्यको तुलनामा प्रतितोला ४० रुपैयाँले बढेर एक हजार चार सय ४० रुपैयाँ पुगेको महासंघले जनाएको छ । महासंघले अन्तराष्ट्रिय बजारमा हुने सुन तथा चाँदीको कारोबार मूल्यका आधारमा यहाँ दैनिक सुन तथा चाँदीका मूल्य तोक्दै आएको छ । अन्तर्राष्ट्रिय बजारमा हाल सुन प्रतिऔंस दुई हजार २४ अमेरिकी डलरमा कारोबार भइरहेको छ ।