उपनिर्वाचन लड्ने रास्वपाका तीन उम्मेदवार घोषणा

राष्ट्रिय स्वतन्त्र पार्टी (रास्वपा) ले आसन्न वैशाख १० गते हुने तय भएको उपनिर्वाचनमा आफ्नो पार्टीका तर्फबाट प्रतिस्पर्धा गर्ने उम्मेदवारको टुंगो लगाएको छ।

पार्टी कार्यालय महाराजगञ्जमा कार्यक्रम गरी रास्वपाले चितवन–२ मा अध्यक्ष रवि लामिछाने, तनहुँ–१ मा स्वर्णिम वाग्ले र बारा–२ मा रमेश खरेललाई उम्मेदवार बनाउने घोषणा गरेको हो।

गत मंसिरको चुनावमा चितवन २ मा रवि लामिछाने नै निर्वाचित भएका थिए। तर, नागरिकतासम्बन्धी विवादमा सर्वोच्च अदालतले उनको पद खारेज गरेपछि त्यहाँ उपचुनाव हुन लागेको हो।

नेपाली कांग्रेसबाट निर्वाचित रामचन्द्र पौडेल राष्ट्रपति भएपछि खाली रहेको तनहुँ–१ मा रास्वपाले कांग्रेस छाडेका वाग्लेलाई उम्मेदवार बनाउन लागेको हो।

बारा–२ मा उठ्न लागेका खरेल भने गत मंसिरको चुनावमा हाम्रो सुशासन पार्टीबाट काठमाडौं–१ मा उठेका थिए। काठमाडौं–१ मा पाँचौं भएका खरेल अहिले पार्टी परिवर्तन गरेर बारा–२ मा रास्वपाबाट उपचुनाव लड्न लागेका हुन्।

रामसहायप्रसाद यादव उपराष्ट्रपति भएपछि बारा–२ मा उपचुनाव हुन लागेको हो।