सेनाको गरिमा र प्रतिष्ठा अभिवृद्धिमा भूतपूर्व सैनिकको जिम्मेवारी महत्त्वपूर्ण- प्रधानसेनापति

प्रधानसेनापति प्रभुराम शर्माले नेपाली सेनाको संवेदनशीलता, नीति नियम र अनुशासनलाई ख्याल गर्ने गरिमा र प्रतिष्ठा अभिवृद्धि गर्न भूपू सैनिकको महत्त्वपूर्ण जिम्मेवारी हुने बताएका छन्।

नेपाली सेनाको व्यवस्थापन र कल्याणकारी वार्डको संयोजनमा आज घोराहीस्थित रणसिंह दल गणमा आयोजित नेपाली सेना भूपू सैनिक सम्मेलनको उद्घाटन गर्दै प्रधानसेनापति शर्माले समाजमा उदाहरणीय रूपमा प्रस्तुत भई नेपाली सेनाको प्रतिष्ठा अभिवृद्धि गर्न भूपू सैनिकलाई अनुरोध गरे।

उनले नेपाली सेनाको संस्थागत हितलाई सदैव ध्यान दिई सैनिक सेवामा प्राप्त ज्ञान, सीप र अनुभवका आधारमा जनताको सेवामा सकारात्मक योगदान पुर्‍याउन अनुरोध गरे। कुनै पनि राजनीतिक पार्टीसँग आबद्ध नभई संविधान र कानूनबमोजिम अहोरात्र खटिरहेको नेपाली सेनाप्रति नकारात्मक टीकाटिप्पणी र झुठा समाचार सम्प्रेषण हुने गरेको भन्दै दुःख व्यक्त गरे। उनले सेनाको मनोबल घटाउने त्यस्ता अवाञ्छित क्रियाकलापप्रति सचेत रहन सम्बद्ध पक्षको ध्यानाकर्षण गराए।

प्रधानसेनापति शर्माले सूचना प्रविधिको विकाससँगै त्यसको दुरुपयोग हुने गरेको उल्लेख गर्दै सत्यतथ्य र आधिकारिक सूचना र समाचारका आधारमा सेनाप्रतिको धारणा बनाउन अनुरोध गरे। उनले विसं २०३२ देखि सुरु भएको शान्ति मिसन कार्यक्रमबाट रकम प्राप्त भई स्थापना भएको कल्याणकारी कोषमा अहिले ७३ अर्ब १३ करोड रुपैयाँ रहेको जानकारी दिए।

विभिन्न तह र पदका गरी छ हजार पाँच जना नेपाली सेना शान्ति स्थापना अभियानअन्तर्गत विभिन्न देशमा कार्यरत रहेको बताउँदै उनले कल्याणकारी कोषबाट आयआर्जन हुने रकम सैनिक परिवारको शिक्षा, स्वास्थ्य उद्यमशीलता कार्यक्रममा लगानी भइरहेको स्पष्ट गरे। सीमित स्रोतसाधनका बाबजुद शिक्षा, स्वास्थ्यसहित रोजगारी सिर्जनाका क्षेत्रमा अहिलेसम्म आठ अर्ब रुपैयाँ लगानी भइसकेको उल्लेख गर्दै प्रधानसेनापति शर्माले भूपू सैनिक र आश्रित परिवारलाई ध्यानमा राखेर समयसापेक्ष एवं परिष्कृत कार्यक्रम सञ्चालन गर्ने लक्ष्यलाई निरन्तरता दिइने स्पष्ट गरे।

नेपाली सेना कल्याणकारी बोर्डका प्रमुख कार्यकारी अधिकृत गौरव तण्डुलले शिक्षा, स्वास्थ्य सीपमूलक तालिमका लागि सहयोग गर्दै आएको बताए। अवकाशप्राप्त सैनिकका तर्फबाट रथी नेपालभूषण चन्दले हरेक तीन वर्षमा हुने यस किसिमको सम्मेलनबाट भूपू सैनिक र आश्रित परिवार एवं नेपाली सेनाबीचको सम्बन्ध अझ प्रगाढ र जीवन्त हुने विश्वास व्यक्त गरे।

बलाध्यक्ष रथी सीताराम खड्काले कल्याणकारी कोषको रकमलाई आयमूलक क्षेत्रमा लगानी गरी प्राप्त आयस्रोतबाट अवकासप्राप्त सेना र आश्रित परिवारको शिक्षा, स्वास्थ्य, कृषिलगायत क्षेत्रमा सहयोग उपलब्ध गराई आर्थिक तथा सामाजिक जीवनस्तर सुधारको पक्षमा नेपाली सेना रहेको स्पष्ट गरे। त्यस्तै सोही कार्यक्रममा नेपाल राष्ट्रिय भूतपूर्व सैनिक सङ्घका महासचिव श्यामसुन्दर घिमिरेले अवकाशप्राप्त सेनाको शिक्षा, स्वास्थयलगायतका क्षेत्रमा नेपाली सेनाबाट प्राप्त सहयोगका लागि धन्यवाद दिँदै आउँदा दिनमा अझ बढी साथ सहयोग प्राप्त हुने विश्वास व्यक्त गरे।

नेपाली सेना कल्याणकारी बोर्ड र हिताधिकारी केन्द्र एवं नेपाली सेनाको स्थानीय युनिटमार्फत अवकाशप्राप्त सैनिक एव आश्रित परिवारलाई सहयोग उपलब्ध गराइने व्यवस्था रहेको नेपाली सेनाले जनाएको छ। सोही कार्यक्रमा प्रधानसेनापति शर्माले नयाँ गोरख गणबाट अवकासप्राप्त प्यूठानका ज्येष्ठ पूर्वसैनिक करिब ९० वर्षीय हुकुम बहादुरखत्री र गुल्मीकी ज्येष्ठ एकल महिला ९२ वर्षीया सावित्रादेवी थापालाई अभिनन्दन गरे।

उनले बहालवाला तथा पूर्वसैनिक र हिताधिकारी गैरसैनिक नागरिकबाट अशक्त सात जनालाई ह्वील चेयर र तीन जनालाई वैशाखी वितरण गरे। साथै उनले पाँच महिला उद्यमीलाई कर्जा रकमको चेक हस्तान्तरण गरे। कर्जा रकम प्राप्त गर्नेमा पूर्वसैनिक परिवार प्यूठान नगरपालिका-७ का रामचन्द्र श्रेष्ठकी श्रीमती सुशीला श्रेष्ठ, राप्ती गाउँपालिका-४ दाङका रेशमा गिरी, राप्ती गाउँपालिका-१ की कल्पना पछाई, प्यूठानकी प्रतीक्षा विक र तुलसीपुर उपमहानगरपालिका-१७ की नम्रता चौधरी रहेका छन्।

प्रधानसेनापति शर्माले दुई सर्वोत्कृष्ट उद्यमीलाई पनि सम्मान गरे। सम्मानित हुनेमा घोराही-१८ निवासी अवकासप्राप्त स्व दिनेश गिरीकी श्रीमती करमला गिरी र सल्यान जिल्ला बागचौर नगरपालिका-२ निवासी अवकासप्राप्त सैनिक झक्कु बस्नेत रहेका छन्। उनले चार सन्ततिलाई सेवा गर्न प्रेरित गराउने मातापितालाई पनि सम्मान गरे।

लुम्बिनी प्रदेशका दाङ, रोल्पा, प्यूठान, पूर्वी रुकुम र कर्णाली प्रदेशका सल्यान र पश्चिम रुकुमका गरी एक हजार ३९ भूपू सैनिकको सहभागिता रहेको थियो। सो अवसरमा १९ नम्बर बाहिनी अड्डाअन्तर्गत सम्पूर्ण युनिटले जिल्लागत विशेषको झाँकी प्रदर्शन गर्नुका साथै सैनिक गान नृत्य, स्थान विशेषको सांस्कृतिक नृत्य प्रदर्शन गरेका थिए।