कांग्रेस सभापति देउवा र भारतीय विदेशसचिव क्वात्राबीच भेटवार्ता

भारतीय विदेशसचिव विनयमोहन क्वात्राले पूर्वप्रधानमन्त्री एवं नेपाली कांग्रेसका सभापति शेरबहादुर देउवासँग भेटवार्ता गरेका छन्। सोमबार साँझ देउवा निवास धुम्बाराहीमा उनीहरूबीच भेटवार्ता भएको हो।

भेटमा आपसी हित र सहकार्यका विविध विषयमा छलफल भएको देउवाको सचिवालयले जनाएको छ।

यसअघि उनले प्रधानमन्त्री ‘प्रचण्ड’लाई भेटेर भारत भ्रमणको निम्तो दिएका छन्।

उनले आजै राष्ट्रपति विद्यादेवी भण्डारी परराष्ट्रमन्त्री डा. विमला राई पौड्यालसँग पनि भेटवार्ता गरेका छन्। उनले नेकपा (एमाले)का अध्यक्ष केपी शर्मा ओलीसँग पनि भेटवार्ता गर्ने कार्यक्रम छ।

साेमबार बिहान काठमाडौं आइपुगेका क्वात्रा भोलि स्वदेश फर्कनेछन्।