एशियन हाइड्रोपावरले सर्वसाधारणका लागि आईपीओ खुला गर्दै
१७ माघ २०७९ १४:०९
एशियन हाइड्रोपावर कम्पनी लिमिटेडले सर्वसाधारणका लागि साधारण शेयर निष्कासन तथा बिक्री खुला गर्ने भएको छ। कम्पनीले यही माघ २७ गतेदेखि प्रतिकित्ता एक सय रुपैंयाँ अंकित दरमा ६ लाख ९७ हजार २ सय कित्ता शेयर प्राथमिक सार्वजनिक निष्कासन गर्ने भएको हो।
कम्पनीले जारी पुँजी रू ३४ करोडको २४ दशमलव ७१ प्रतिशतले हुने ८ करोड ४० लाख रुपैंयाँ मूल्य बराबरको कुल ८ लाख ४० कित्ता साधारण शेयर सर्वसाधारण, वैदेशिक रोजगारीमा रहेका नेपाली सामूहिक लगानी कोष तथा कर्मचारीमा छुट्याएको थियो। जसमा, ८४ हजार कित्ता शेयर वैदेशिक रोजगारमा रहेका नेपाली र ४२ हजार कित्ता सामूहिक लगानी कोषलाई बाँडफाँड गरिएको छ।
त्यस्तै १६ हजार ८ सय कित्ता कर्मचारीलाई सुरक्षित गरी बाँकी ६ लाख ९७ हजार २ सय कित्ता साधारण शेयर सर्वसाधारणमा सार्वजनिक निष्कासन गरिने कम्पनीले सार्वजनिक गरेको आह्वानपत्रमा उल्लेख छ।
निष्कासन गरिने शेयरमा लगानीकर्ताले छिटोमा आगामी फागुन २ गतेसम्म र सो अवधिसम्म मागबमोजिम आवेदन नपरे फागुन १२ गतेसम्म न्यूनतम १० कित्तादेखि अधिकतम २० हजार कित्तासम्म खरिदका लागि आवेदन दिन सक्नेछन्।
लगानीकर्ताले नेपाल धितोपत्र बोर्डबाट स्वीकृति प्राप्त ‘आस्वा’ सदस्य बैंक तथा वित्तीय संस्थाहरु र तिनका तोकिएका शाखा कार्यालयबाट ‘सी आस्वा’ प्रणालीमार्फत् तथा अनलाइनमा ‘मेरो शेयर’ प्रयोग गरी आईपीओका लागि आवेदन दिने व्यवस्था मिलाइएको कम्पनीले जनाएको छ।
कम्पनीलाई केयर रेटिङ्ग्स नेपालले ‘केयरएनपी बीबी आइएस’ प्रमाणपत्र प्रदान गरेको छ । यस्तै कम्पनीको धितोपत्र निष्कासन तथा बिक्री प्रबन्धकमा एनएमबी क्यापिटल रहेको छ।
कम्पनीले इलामको माई जोगमाई गाउँपालिका र इलाम नगरपालिकाको जोगमाई खोलामा ६ दशमलव २ मेगावाट क्षमताको तल्लो जोगमाई खोला जलविद्युत् आयोजना निर्माण गरेकोे छ।
प्रतिक्रिया