टाइगर कप : महिलातर्फको उपाधिका लागि एपीएफ र आर्मी भिड्ने

पोखरामा जारी तेस्रो संस्करणको ‘टाइगर कप’ भलिबल प्रतियोगितामा महिलातर्फको उपाधिका लागि सशत्र प्रहरी बलको एपीएफ क्लब र त्रिभुवन आर्मी क्लब भिड्ने भएका छन् । पोखरा रङ्गशालामा आज भएको पहिलो सेमिफाइनल खेलमा गण्डकी प्रदेशलाई ३–० को सोझो सेटमा पराजित गर्दै एपीएफले फाइनलमा स्थान पक्का बनाएको हो । २५–१३, २५–१७ र २५–२१ ले गण्डकी एपीएफसामु स्तब्ध बनेको थियो ।

यस्तै दोस्रो सेमिफाइनल खेलमा होंगान्जी न्यू डायमण्ड युथ स्पोर्ट्स क्लबलाई ३–१ ले हराउँदै त्रिभुवन आर्मी क्लबले फाइनलको यात्रा तय गरेको हो । पहिलो सेट २३–२५ ले गुमाएको आर्मी २५–१३, २५–२२ र २५–१२ ले विजयी हुँदै फाइनलमा पुगेको हो । तृतीय स्थानका लागि गण्डकी प्रदेश र होंगान्जी न्यू डायमण्ड युथ स्पोर्टस् क्लबबीच प्रतिस्पर्धा हुनेछ । आइतबारदेखि सुरु भएको प्रतियोगिताअन्तर्गत पुरुषतर्फका सेमिफाइनल खेल शुक्रबार हुनेछन् ।

पहिलो खेल एपीएफ क्लब र नेपाल पुलिस क्लबबीच हुनेछ । दोस्रो खेलमा फाइनलका लागि त्रिभुवन आर्मी क्लब र गण्डकी प्रदेशबीच प्रतिस्पर्धा हुने जनाइएको छ । प्रतियोगितामा महिलातर्फ चार र पुरुषतर्फ पाँच टोलीको सहभागिता छ । महिलातर्फ गण्डकी प्रदेश, त्रिभुवन आर्मी क्बल, एपीएफ क्लब र न्यू डायमण्ड स्पोर्टस क्लबको सहभागिता छ । पुरुषतर्फ श्रीलंकाको एसटी जोसेफ वाज स्पोर्ट्स क्लब, त्रिभुवन आर्मी क्लब, नेपाल पुलिस क्लब, एपीएफ क्लब र गण्डकी प्रदेशले सहभागिता जनाएको छ ।

टाइगर ग्रुप अफ पोखराद्वारा आयोजित उक्त प्रतियोगिताको महिला र पुरुष दुवैतर्फ उपाधि विजेतालाई पाँच–पाँच लाख, उपविजेतालाई समान दुई लाख ५० हजार नगद पुरस्कार प्रदान गरिनेछ । प्रतियोगितमा तेस्रो हुनेलाई नगद एक लाख २५ हजार र सान्त्वना हुने टिमलाई रु६५ हजारसहित ट्रफी र प्रमाणपत्र प्राप्त गरिनेछ । महिला र पुरुषतर्फ उत्कृष्ट एक–एक खेलाडीलाई जनही रु २५ हजार र विधागत रूपमा उत्कृष्ट प्रदर्शन गर्ने खेलाडीलाई १० हजार र ट्रफीसहित सम्मान गरिनेछ । महिला र पुरुष दुवैतर्फको फाइनल खेल शनिबार हुने आयोजक संस्थाका सचिव डीबी नेपालीले जानकारी दिए । गत वर्ष भएको दोस्रो संस्करणको उक्त प्रतियोगिताको उपाधि पुरुषतर्फ त्रिभुवन आर्मी क्लब र महिलातर्फ एपीएफले जितेको थियो ।