नेप्से परिसूचकमा सामान्य गिरावट

धितोपत्र बजारमा शेयर कारोबारमापक नेप्से परिसूचक आज झिनो अंकले ओरालो लागेको छ। नेपाल स्टक एक्सचेञ्जका अनुसार नेप्से परिसूचक शून्य दशमलव ४१ अंकले घटेर दुई हजार एक सय ८३ दशमलव २१ मा सीमित भएको छ।

आजको कारोबारमा ठूला कम्पनीको शेयर कारोबारमापन गर्ने सेन्सेटिभ परिसूचक एक दशमलव १० अंकले ओरालो लागेर चार सय १३ दशमलव १४ मा झरेको छ। कारोबार भएका कुल १३ उपसमूहमध्ये छ उपसमूहको शेयर मूल्यमा वृद्धि हुँदा सात उपसमूहको शेयर मूल्यमा गिरावट आएको छ। कारोबार भएकामध्ये कुल एक सय एक कम्पनीको शेयर मूल्यमा वृद्धि हुँदा एक सय सात कम्पनीको शेयर मूल्य घटेको छ। यस्तै पाँच कम्पनीको शेयर मूल्यमा भने कुनै परिवर्तन भएको छैन।

आजको कारोबारमा ७७ लाख ६४ हजार एक सय ५३ कित्ता सेयर दुई अर्ब ८६ करोड ८२ हजार आठ सय ३८ रुपैयाँमा कारोबार भएको छ।

नेप्सेका अनुसार कारोबारका आधारमा समृद्धि फाइनान्स कम्पनी शीर्ष स्थानमा छ। सो कम्पनीको नौ करोड ७० लाख ९५ हजार सात सय छ रुपैयाँ बराबरको कारोबार भएको छ। यस्तै रिडी पावर कम्पनी आठ करोड ६१ लाख ६४ हजार सात सय ६९, आँखु खोला जलविद्युत् कम्पनी सात करोड ३८ लाख ६८ हजार आठ सय ९४, नेपाल लाइफ इन्स्योरेन्स कम्पनी छ करोड ६७ लाख ६७ हजार नौ सय ३४ र अपि पावर कम्पनी छ करोड ४१ लाख आठ हजार आठ सय १४ रुपैयाँ बराबरको कारोबार भई शीर्ष पाँचभित्र पर्न सफल भए।

नेप्सेका अनुसार लुम्बिनी जनरल इन्स्योरेन्स, आर्दश लघुवित्त, बाराही हाइड्रोपावरको शेयर मूल्यमा १० प्रतिशतले वृद्धि भई सकारात्मक सर्किट लागेको छ। यस्तै सूर्योज्योति लाइफ इन्स्योरेन्स नौ दशमलव ९८ र साञ्जेन जलविद्युत् कम्पनीको लगानीकर्ताले आठ दशमलव २३ प्रतिशतले कमाएका छन्।

त्यस्तै समृद्धि फाइनान्स सात दशमलव ६८, सप्तकोसी डेभलपमेन्ट बैंक चार दशमलव ५०, ग्रीन भेञ्चर्स चार दशमलव ५०, सर्पोट माइक्रोफाइनान्स तीन दशमलव ७३ र सानिमा इक्विटी फण्डका लगानीकर्ताले तीन दशमलव ६४ प्रतिशतले गुमाएका छन्।