महिला क्रिकेट : प्रदेश १ र सुदूरपश्चिम प्रदेशको लगातार दोस्रो जित

सुदूरपश्चिम प्रदेश र प्रदेश १ ले इटहरीमा जारी प्रधानमन्त्री कप राष्ट्रिय महिला टी–२० क्रिकेट प्रतियोगितामा लगातार दोस्रो जित निकालेका छन्।

इटहरीको जनता क्रिकेट पार्कमा सोमबार सम्पन्न दोस्रो खेलमा सुदूरपश्चिम प्रदेशले गण्डकी प्रदेशलाई ९ विकेट तथा पहिलो खेलमा प्रदेश १ ले लुम्बिनी प्रदेशमाथि ९ रनको रोमाञ्चक जित निकाल्दा दुवै टोलीले जारी प्रतियोगितामा लगातार दोस्रो जित निकालेका हुन्। यस जितसँगै समूह ‘ए’ को सुदूरपश्चिमले दुई खेलमा चार अंक जोड्दा गण्डकीले लगातार दोस्रो हार व्यहोरेको छ।

पहिलो खेलमा सुदूरपश्चिमले वाग्मती प्रदेशलाई ३३ रनले हराउँदा गण्डकी विभागीय टोली एपीएफसँग सात विकेटले पराजित भएको थियो। सोमबार गण्डकीले प्रस्तुत गरेको ६१ रनको लक्ष्य सुदूरपश्चिमले ११ ओभरमा १ विकेटको क्षतिमा भेट्टायो। सुदूरपश्चिमका लागि कप्तान विन्दु रावलले ४३ बलमा आठ चौका मद्दतमा अविजित ४६ रनको पारी खेलिन्। यस्तै शोभा रोकाय ८ रनमा अविजित रहिन्। गण्डकीका लागि एकमात्र विकेट निरुता जिटीले हात पारिन्।

यसअघि टस जितेर ब्याटिङ रोजेको गण्डकीले पूरै २० ओभरमा ९ विकेटको क्षतिमा ६० रनको योगफल बनाएको थियो। गण्डकीका लागि सिमान केसीले १३ रन बनाउनुबाहेक अन्य खेलाडीले दोहोरो अंकको स्कोर बनाउन सकेनन्। बलिङतर्फ सुदूरपश्चिमका लागि मनिषा चौधरीले ४ तथा स्नेहा महरा र ईश्वरी विष्टले समान १/१ विकेट लिए।

प्रतियोािगताअन्तर्गत सोमबार नै सम्पन्न दिनको पहिलो खेलमा प्रदेश १ ले लुम्बिनी प्रदेशमाथि ९ रनको रोमाञ्चक जित निकाल्न सफल भएको हो। इटहरीको जनता पार्कमा ढिलो गरी सुरु भएको खेलमा लुम्बिनी प्रदेशलाई ९ रनले हराउँदै प्रदेश १ ले लगातार दोस्रो जित निकालेको हो। मैदान ओसिलो भएपछि ९ ओभरमा झारिएको खेलमा प्रदेश एकले लुम्बिनीलाई ६० रनको लक्ष्य दिएको थियो। जवाफी ब्याटिङ गरेको लुम्बिनीले पूरै ९ ओभरको समाप्तिमा ७ विकेट गुमाएर मात्र ५० रन जोड्न सक्यो। लुम्बिनीका लागि ओपनर लक्ष्मी चौधरीले सर्वाधिक ३१ रनको जोडेकी थिइन्। १७ बल सामना गरेकी लक्ष्मीले ४ चौका र १ छक्का प्रहार गरेकी हुन्। कप्तान सरस्वती जीएमले ६ रन जोड्नुबाहेक अन्य खेलाडीले राम्रो स्कोर बनाउन सकेनन्। रोमाञ्चक जित निकाल्ने कसिलो बलिङ गरेको प्रदेश १ का लागि संगीता राईले सर्वाधिक ३ विकेट निकाल्दा सबनम राई, ज्योति दनुवार र रुबिना क्षेत्रीले समान १/१ विकेट हात पारे ।

त्यसअघि टस जितेर पहिला ब्याटिङ गरेको प्रदेश १ ले छोट्याइएको ९ ओभरमा ४ विकेट गुमाएर ५९ रन बनाएको थियो। काजल श्रेष्ठले सर्वाधिक २१ रनको पारी खेल्दा कप्तान रुबिना क्षेत्रीले १७ रन जोडिन्। यस्तै अप्सरी बेगमले १२ रन जोड्दा स्मृति कटुवाल र सबनम राई क्रमश ४ र १ रनमा अविजित रहे। प्रदेश १ को चार विकेट निकाल्ने क्रममा लुम्बिनीकी कृतिका मरासिनी, सरस्वती पुन र विभष्णा बीसीले १/१ विकेट लिए। यस जितसँगै प्रदेश १ ले २ खेलमा ४ अंक जोडेको छ। प्रदेश १ समूह ‘बी’ को शीर्ष स्थानमा रहेको छ।

प्रतियोगितामा मंगलबार पनि दुई खेल हुनेछन्। दिनको पहिलो खेल कर्णाली र प्रदेश १ तथा दोस्रो खेल सुदूरपश्चिम र विभागीय टोली एपीएफबीच प्रतिस्पर्धा हुनेछ।