न्यायालयका समस्या क्रमशः समाधानउन्मुख : कामु प्रधानन्यायाधीश कार्की
२८ मंसिर २०७९ १७:४९
फाइल तस्बिर।
सर्वोच्च अदालतका कायममुकायम प्रधानन्यायाधीश हरिकृष्ण कार्कीले न्यायसम्पादनमा देखिएका समस्या क्रमशः समाधानउन्मुख भएको बताएका छन्। उनले सामूहिक प्रयासमा न्यायसम्पादनलाई प्रभावकारी बनाउँदै पाँच वर्ष नाघेका मुद्दालाई छुट्टै व्यवस्थापन गरी फर्स्योट गर्न थालिएको बताए।
बुधबार उच्च अदालत पोखरा बागलुङ इजलास भवनको शिलान्यास कार्यक्रममा उनलेसर्वोच्च अदालतले गोलाप्रथाद्वारा न्याय सम्पादन गर्ने, पाँच वर्ष नाघेका मुद्दाको छुट्टै व्यवस्थापन गर्ने र न्यायालयमा विचलन आउन नदिन न्यायालय सुधारका धेरै योजना अहिले कार्यान्वयनको चरणमा रहेको बताए।
‘न्यायलयमा केही समस्या नभएका होइनन् छन्, त्यसलाई बिस्तारै सुधार गर्न लागिएको छ, अहिले गोला प्रथाद्वारा न्यायसम्पादन भइरहेको छ, पाँच वर्ष बढीका मुद्दालाई तीव्र रूपमा फर्स्योट गर्ने कार्य भइरहेको छ,’ कार्कीले भने, ‘अल्पकालीन अन्तरिम आदेश लिएर लामो समय अल्झाउने कार्यलाई अहिले एक हप्ताभित्रै ल्याएका छौँ, सामूहिक प्रयासमा मात्रै न्याय सम्पादन सहज बनाउन सकिन्छ।’
उनले अदालतका पूर्वाधार गुणस्तरीय हुनुपर्नेमा जोड दिए। विसं २०७२ को भूकम्पले क्षति पुगेको भवन सात वर्षपछि पुनःनिर्माण थालिएको हो। ३० महिनाभित्र अदालतको मुख्य भवन तथा आवास निर्माण सक्नेगरी ५७ करोड ४२ लाख रुपैयाँमा श्यामसुन्दर पशुपति जेभी काठमाडौँले ठेक्कामार्फत काम सुरु गरेको छ। अहिले उच्च अदालतको पुरानो भवन भत्काउने कार्यले तीव्रता पाएको छ।
अदालतको भवन प्रविधि, अपाङ्गता, भूकम्प प्रतिरोधी बागलुङ बजारमा निर्माण भइरहेका अन्य भवनभन्दा ठूलो र आधुनिक भएको भवन निर्माणको प्राविधिक सहयोगी सघन शहरी तथा भवन निर्माण कार्यालय बागलुङकी प्रमुख सुनिता श्रेष्ठले जानकारी दिइन् ।
सम्बन्धित समाचार
प्रतिक्रिया