अर्घाखाँचीबाट दिल्ली पुर्याइएकी किशाेरीको डेढ महिनापछि यसरी भयाे उद्धार
२३ मंसिर २०७९ १९:४४
फाइल तस्बिर।
अर्घाखाँचीबाट हराएकी एक किशाेरीकाे डेढ महिनापछि भारतको नयाँदिल्लीबाट आज (शुक्रबार) उद्धार गरिएको छ । गत कात्तिक २४ गतेदेखि हराएकी सन्धिखर्क नगरपालिका निवासी १७ वर्षीया किशाेरीलाई शान्ति पुनःस्थापना गृह बाँकेले देहरादुनस्थित हेल्पक्रस संस्था र भारतीय प्रहरीको सहयोगमा उद्धार गरेको गृहका क्षेत्रीय संयोजक भूमिराज भट्टराईले जानकारी दिए ।
उनका अनुसार दिल्लीको कोटला थानाका इन्चार्ज सुनिल गोडियालको सक्रियतामा किशाेरीलाई ललाइफकाइ भारत पुर्याउने सन्धिखर्क नगरपालिका–६ अर्घाखाँची निवासी २४ वर्षीय सुभाष नेपालीलाई समेत पक्राउ गरी जिल्ला प्रहरी कार्यालय बाँकेमा बुझाइएको छ ।
किशाेरीका अभिभावकले खोजतलासका लागि जिल्ला प्रहरी कार्यालय अर्घाखाँची र शान्ति पुनःस्थापना केन्द्र बाँकेमा निवेदन दिएका आधारमा खोजी गर्ने क्रममा भारतको नयाँदिल्लीमा युवा–युवतीलाई फेला पारिएको थियो । भारतीय प्रहरीको सहयोगमा उनको खोजतलास गर्न १० दिन समय लागेको थियो ।
उद्धार गरिएकी किशाेरीलाई परिवारको जिम्मा लगाउने तयारी भइरहेको शान्ति पुनःस्थापना गृह बाँकेका संयोजक निर्मल सुवेदीले जानकारी दिए ।
सम्बन्धित समाचार
प्रतिक्रिया