देउवा र म मिलिसक्यौं : शेखर कोइराला
३१ असोज २०७९ १५:३३
नेपाली कांग्रेसका नेता डा. शेखर कोइरालाले दुई पक्षका कार्यकर्ता एकआपसमा भिडेर केही पनि प्राप्त नहुने बताएका छन् ।
उनले सभापति शेरबहादुर देउवा र आफू मिलिसकेको पनि बताएका छन् ।
मोरङको हरैंचामा आयोजित चुनावी कार्यक्रममा बोल्दै नेता कोइरालाले कार्यकर्तालाई विवाद नगर्न सुझाव दिए ।
‘स्थानीय निर्वाचनमा के भयो, महाधिवेशनमा के भयो, त्यो तुषलाई तपाईंहरू सबैले त्याग्नुस्,’ उनले भने, ‘तुष मैले त त्यागिसकेँ । तपाईंहरूले किन नत्याग्ने?’
१४ औं महाधिवेशनमा सभापतिका लागि देउवा र आफू पक्षधर तलैबाट लड्दै केन्द्रसम्म प्रतिस्पर्धा गरेको उनले सुनाए । ‘जब शेरबहादुर देउवा जी र म नै मिलिसकेपछि वडामा तपाईंहरू किन झगडा गर्नुहुन्छ ?’ कार्यकर्तालाई उनले प्रश्न गरे, ‘किन झगडा गर्नुभएको छ, मैले बुझ्न सकेको छैन ।’
प्रतिस्पर्धा तलदेखि देउवासँग आफ्नो भएको र त्यो लडाइँ अब समाप्त भइसकेको उनले बताए । ‘शेरबहादुर देउवा र म एकै ठाउँमा उभिएका छौं । पटकपटक शेरबहादुर जीसँग मैले भेटिरहेको छु,’ कोइरालाले भने, ‘मेरा कुरा सुनिरहनु भएको छ । मेरो कुरा मानिरहनुभएको छ । तर, तपाईंहरू तल किन लडिरहनुभएको छ, मैले बुझिरहेको छैन । केको लागि लडिरहनुभएको छ ?’
सम्बन्धित समाचार
प्रतिक्रिया