मन्त्री कार्कीले ग्रहण गरे कानून मन्त्रालयको पदभार

कानून, न्याय तथा संसदीय मामिलामन्त्री ज्ञानेन्द्रबहादुर कार्कीले शुक्रबार पदभार ग्रहण गरेका छन् ।

सञ्चार तथा सूचना प्रविधिमन्त्री कार्कीले कानून मन्त्रालयको समेत जिम्मेवारी लिएपछि शुक्रबार पदभार ग्रहण गरेका हुन् ।सो अवसरमा मन्त्री कार्कीले कानूनी शासन र सुशासनलाई व्यवहारिक रूपमै कार्यान्वयन गर्ने प्रतिबद्धता व्यक्त गरे ।

उनले भने, “कानुनको पहुँचमा नभएकाहरूलाई केन्द्रमा राखेर कानुन निर्माण र सुधार निरन्तररूपमा चलिरहने प्रक्रिया हो, संसद्मा पेश भएका र पेस हुन नसकेका विधेयकहरूलाई निर्वाचनपछि गठन हुने संसद्मा पेश गर्न सहज हुने तरिकाले मैले आवश्यक गृहकार्य गर्नेछु ।”

मन्त्री कार्कीले स्वतन्त्र न्यायपालिकाप्रति आफ्नो सदैव सम्मान रहेको बताउँदै वर्तमान सरकार निष्पक्ष, शान्तिपूर्ण र विधिसंवत रूपमा निर्वाचन सम्पन्न गर्नेतर्फ केन्द्रित रहेको बताए । आगामी मङ्सिर ४ गतेको चुनावपछि गठन हुने सरकारले मुलुकलाई आर्थिक विकासको बाटोमा अगाडि बढाउने उनको विश्वास छ ।

मन्त्रालयका सचिव उदयराज सापकोटाले मन्त्रालयको गतिविधि र भावी योजना मन्त्रीसमक्ष प्रस्तुत गरेका थिए ।