दक्ष जनशक्ति निर्माणका लागि निजी क्षेत्र आफैँ जागरुक हुन आवश्यक : उपाध्यक्ष श्रेष्ठ
९ असोज २०७९ २०:३४
नेपाल उद्योग वाणिज्य महासंघका उपाध्यक्ष अञ्जन श्रेष्ठले तालिममार्फत दक्ष जनशक्ति निर्माणका लागि निजी क्षेत्र आफैँ जागरुक हुनुपर्ने बताएका छन् । आइतबार महासंघमा भएको वस्तुगत परिषद्का सदस्यहरूसँग सर्टटप वर्क तालिम सम्झौता कार्यक्रममा बोल्दै उपाध्यक्ष श्रेष्ठले यस्तो बताएका हुन् ।
उनले राज्यले सरकारी कर्मचारीलाई नै तालिममार्फत दक्ष बनाउन नसकेको बताए । उपाध्यक्ष श्रेष्ठले राज्यले निजी क्षेत्रका उद्योगका लागि दक्ष जनशक्ति उत्पादन अहिलेसम्म नगरेको भन्दै निजी क्षेत्र आफँै अघि बढ्नुपर्ने आवश्यकता रहेको बताए ।
उनले मुलुकको अर्थतन्त्रमा ७० प्रतिशत लगानी निजी क्षेत्रको रहेको भन्दै दक्ष जनशक्ति उत्पादन पनि आफैँ गर्नुपर्ने बताए । उनले राज्यले दक्ष जनशक्ति उत्पादनको लागि राज्य ठूलो लगानी गरे पनि प्रभावकारी नभएको बताए ।
उपाध्यक्ष श्रेष्ठले निजी क्षेत्रका साना, मझौला र ठूला उद्योगमा काम गर्ने श्रमिकहरू ५० प्रतिशत दक्ष जनशक्ति नभएको दाबी गरे । उनले त्यस्ता उद्योगमा ४० प्रतिशत मात्रै दक्ष जनशक्ति रहेको बताए ।
उपाध्यक्ष श्रेष्ठले कर्णाली प्रदेशमा ९० प्रतिशत नै दक्ष जनशक्ति नभएकाले अहिलेसम्म विकास नभएको बताए । उनले दक्ष जनशक्ति उत्पादनको लागि सीप विकास तालिममा अर्बौं लगानी गरेर पनि प्रभावकारी नभएको र सरकारले तालिम दिएर कर्मचारी समेत अर्को ठाउँमा सरुवा गर्दा दक्ष कर्मचारीको अभाव हुने गरेको बताए ।
प्रतिक्रिया