चोलेन्द्रले भने- सरकारले निवास गेटमै तालाबन्दी गरिदियो
२ असोज २०७९ ११:४७
फाइल तस्बिर
आजदेखि नियमित काममा फर्किने तयारी गरेका निलम्बित प्रधानन्यायाधीश चोलेन्द्र शमशेर जबराले आफू सर्वोच्च अदालत जान तयार भइसकेपछि सरकारले आफ्नो निवासकाे गेटमा तालाबन्दी गरिदिएको बताएका छन् ।
उनले आफू बिहान ११ बजे नै सर्वोच्च पुग्नेगरी तयारी गरेको तर निवास गेटमै तालाबन्दी गरेर प्रहरी परिचालन गरिएपछि बाहिर निस्कन नपाएको बताएका छन् ।
संसद्को कार्यकाल सकिएसँगै आफूविरुद्धको महाभियोग निस्तेज भइसकेको दाबी गर्दै जबराले आइतबारदेखि नियमित काममा फर्किने सूचना शनिबार सर्वोच्च प्रशासनलाई पठाएका थिए । उक्त विषय बाहिर आएपछि कानून व्यवसायीहरूले उनलाई मूल गेटमै रोक्ने तयारी गरेका छन् । जबरा काममा फर्किने सूचनापछि सर्वोच्च अदालत क्षेत्रमा सुरक्षा तैनाथी पनि बढाइएको छ ।
यसअघि आइतबार बिहान नेपाल बार एसोसिएशनले बैठकमार्फत जबरालाई सर्वोच्च प्रवेश गर्न नदिने निर्णय गरेको थियो ।
महाभियोग सिफारिस समितिले शनिबार साँझ सभामुख अग्निप्रसाद सापकोटालाई जबराविरुद्ध महाभियोग लगाउनुपर्ने आधार र कारणसहितको प्रतिवेदन बुझाएको छ ।
निलम्बन फुकुवा हुन बाँकी रहेको भन्दै कानून व्यवसायीले जबरालाई सर्वोच्च प्रवेशमा रोक लगाउन लागेका हुन् ।
प्रतिक्रिया