बयानका लागि सिंहदरबार पुगे चोलेन्द्र

निलम्बित प्रधानन्यायाधीश चोलेन्द्र शमशेर जबरा संसद्को महाभियोग सिफारिस समितिसमक्ष बयानका लागि सिंहदरबार पुगेका छन् ।

बुधबार सिंहदरबारस्थित कानून, न्याय तथा मानव अधिकार समितिको बैठक कक्षमा निलम्बित प्रधानन्यायाधीश जबरा बयानका लागि पुगेका हुन् ।

भाद्र ८ गते बसेको महाभियोग सिफारिस समितिको बैठकले निलम्बित प्रधानन्यायाधीश राणालाई आज सोधपुछका लागि बोलाएको थियो । प्रधानन्यायाधीश जबरा सिंहदबार पुगे पनि समितिको बैठक भने अझै सुरु भएको छैन ।

समितिलाई राणामाथि लागेको आरोप पुष्टि हुनेगरी नेपाल बार एशोसिएशनले ३५ बुँदे प्रमाण महाभियोग सिफारिस समितिमा बुझाइसकेको छ ।

प्रधानन्यायाधीश राणालाई संविधान र कानूनको गम्भीर उल्लंघन गरेको, भ्रष्टाचार र गैरकानूनी सम्पत्ति आर्जन गरेको आरोप लागेको छ ।

प्रधानन्यायाधीश राणालाई गत फागुन १ गते सत्तारूढ दलका सांसदहरूले महाभियोग प्रस्ताव संसद्मा दर्ता गराएका थिए । संसद्मा महाभियोग दर्ता भएको ६ महिनापछि संसद्ले महाभियोग छलफलको लागि समितिमा पठाएको थियो ।

नेपालको न्यायिक तथा संसदीय इतिहासमा पहिलो पटक प्रधानन्यायाधीशसँग बयान लिन लागिएको हो । गत १ फागुनमा सत्तारूढ दलले राणामाथि महाभियोग लगाएपछि २३ फागुनमा प्रतिनिधि सभाले महाभियोग सिफारिस समिति गठन गरेको थियो ।