यातायात व्यवस्था कार्यालय कर्णालीका इन्जिनियर र विचौलिया घुससहित पक्राउ

अख्तियार दुरुपयोग अनुसन्धान आयोगले यातायात व्यवस्था कार्यालय कर्णाली प्रदेश, सुर्खेतमा कार्यरत मेकानिकल इन्जिनियर दीपक बम र एक जना विचौलियालाई घुससहित पक्राउ गरेको छ। उनीहरू शुक्रबार पक्राउ परेका हुन्।

सुर्खेतको वीरेन्द्रनगर नगरपालिका–७, स्थित यातायात व्यवस्था कार्यालयमा कार्यरत इन्जिनियर बमले सेवाग्राहीसँग बिलबुक, जाँचपास र रूट पर्मिट नवीकरण नगर्नका लागि घुस मागेको उजुरी अख्तियारमा परेको थियो। उजुपरीपछि अख्तियारको सुर्खेत कार्यालयबाट खटिएको टोलीले इन्जिनियर बम र विचौलियाको काम गर्ने नीरकबहादुर शाहीलाइ तीन हजार रुपैयाँ घुससहित समातेको हो।

उनीहरूका सम्बन्धमा थप अनुसन्धान भइरहेको अख्तियारकाे केन्द्रीय कार्यालय टंगालका प्रवक्ता श्यामप्रसाद भण्डारी प्रेस विज्ञप्ति जारी गरेर जानकारी दिएका छन्।