चार दिन लामो कार्यकाल सकेर बिदा भए राअविका एआईजी थापा, चलखेलले बढुवा प्रभावित
३ साउन २०७९ १३:५७
राष्ट्रिय अनुसन्धान विभाग (राअवि) का अतिरिक्त मुख्य अनुसन्धान निर्देशक (एआईजी) कुलदेव थापा आफ्नो चार दिन लामो कार्यकाल सकेर मंगलबार बिदा भएका छन् । विभागले ३१ असारमा बढुवा भएका थापालाई मंगलबार बिदाई गरेको हो । उनी एआईजीमा ५८ वर्षीय उमेर हदका कारण अनिवार्य अवकाशमा गएका हुन् ।
३१ असारमा बसेकोे मन्त्रिपरिषद् बैठकले थापालाई देशकाे एकमात्र गुप्तचरी निकाय राअविको दोस्रो वरियताको पद अतिरिक्त मुख्य अनुसन्धान निर्देशकमा बढुवा गरेको थियो ।
उनी १० वैशाखमा अवकाश भएका यादवराज रेग्मीको स्थानमा बढुवा भएका थिए ।
बढुवाका प्रतिस्पर्धीबीचको अस्वस्थ्य प्रतिस्पर्धाका कारण पद रिक्त भएपनि राअविमा एआईजी बढुवा भएको थिएन । ३ साउनमै अनिवार्य अवकाश हुने भएपछि चुपचाप बसेका थापालाई सरकारले गठबन्धनबाट दाबी गरिरहेका डीआईजीहरुलाई जिल्याउँदै बढुवा गरेको थियो ।
राअविका प्रमुख मुख्य अनुसन्धान निर्देशक यदुलाल खरेलले २७ भदौंमा उमेरहदकै कारण अनिवार्य अवकाश पाउँदै छन् ।
मंगलबारदेखि रिक्त रहेको पदमा बढुवा हुने डीआईजी नै राअविको भावी नेतृत्व बन्ने सम्भावना बढी भएकाले यतिबेला चर्को दौडधुप र लविङ चलिरहेको छ ।
राअविका डीआईजीमध्ये २०७४ भदौ १४ मा बढुवा भएका ४ अधिकृतहरु मुख्य प्रतिस्पर्धामा छन् । त्यस्तै उनीहरुपछी बढुवा भएका समेत यतिबेला एआईजी बढुवाको दौडधुपमा सक्रिय रहेका छन् ।
बढुवा प्रत्यासीमा यतिबेला डीआईजीहरु हुतराज थापा, ओम जोशी, हरिहर पौडेल र सुनील ढकाल अघिल्लो बढुवाबाट छन् । यस्तै टेकेन्द्र कार्की प्रकाश पाण्डे र सुमन वैद्य समेत यतिबेला बढुवाका लागि जोडबल गरिरहेका छन् ।
यतिबेला बढुवाका लागि बालुवाटार र खुमलटार निकट प्रत्यासीको जोडबलका कारण राअविमा भावी नेतृत्व चयन सोचे अनुसार सहज नहुने संकेत देखिएको छ ।
सम्बन्धित समाचार
प्रतिक्रिया