कार चालकलाई कुटपिट गरी लुट्ने तीन भारतीय पक्राउ
१३ असार २०७९ १९:२३
कैलालीमा कार चालकलाई कुटपिट गरी लुटपाट गर्ने तीन भारतीय नागरिकलाई प्रहरीले पक्राउ गरेको छ ।
उनीहरु प्रदेश ३–०१–०२३ च ८७२१ नम्बरको कारका चालक कञ्चनपुर बेदकोट नगरपालिका–३ बस्ने ३७ वर्षीय लोकेन्द्र भण्डारीलाई कुटपिट र लुटपाट गरी कार लिएर फरार भएका थिए ।
कञ्चनपुर भिमदत्त नगरपालिकाबाट डडेलधुरा आलितालतर्फ जाँदै गरेको उक्त कार कैलाली गोदावरी नगरपालिका–४ गाईमारेमा आईपुग्दा भिमदत्त नगरपालिकाबाटै सोही कारमा खानीडाँडासम्मको लागि लिफ्ट मागी आइरहेका ती ३ जनाले चालकलाई फोटो खिच्ने बहानामा सडकदेखि ५० मिटर तल लगेर कुटपिट समेत गरी उनको मोबाइल, पर्स र कार समेत लिएर फरार भएका थिए ।
खोजी गर्ने क्रममा उक्त कार गोदावरी नगरपालिका–४ स्थित शान्तिनगर जाने भित्री सडकमा फेला परेको थियो ।
प्रहरीले यो घटनामा संलग्न तीनजनालाई भने गोदावरी नगरपालिका–१ मा पर्ने जंगल क्षेत्रबाट पक्राउ गरेको हो ।
प्रहरीका अनुसार पक्राउ पर्नेमा भारतको हरियाणा सोनीपथ घर भएका १८ वर्षीय साहिल बादलिसे, २० वर्षीय सन्नी जोट र २१ वर्षीय भगत सिंह छन् ।
प्रतिक्रिया