एक वर्षमा चार अर्ब ठगी

Posted: August 2, 2013 in By Deepak Kharel

चूडामणि भट्टराई

काठमाडौंमा बसेका सर्वसाधारणले एक वर्षको अवधिमा चार अर्ब रुपैयाँ ठगीबाट गुमाएको तथ्यांक फेलापरेको छ। गत वर्ष साउनदेखि यस वर्ष असार मसान्तसम्ममा आपसी लेनदेनमा मात्रै २३ करोड रुपैयाँ ठगी भएको छ। त्यस्तै टोलटोलमा च्याउजस्तै उम्रिएका सहकारी संस्थाबाट ७१ करोड २६ लाख ९८ हजार रुपैयाँ ठगी भएको छ। सर्वसाधारणको सेयर र निक्षेप रहेका काठमाडौंका बैंकहरूबाट तीन अर्ब रुपैयाँ ठगी भएको पाइएको छ।

लेनदेन कारोबारमा खातामा रकम नै नभएको चेक दिँदा बैंकबाट फिर्ता भएपछि प्रहरीमा परेका उजुरीमध्येबाट ६१ जना पक्राउ परेका थिए भने ६२ वटा मुद्दा दर्ता भएका थिए। दैनिक प्रसस्तै उजुरी पर्ने भए पनि लेनदेन विवाद प्रहरीले हेर्न नमिल्‍ने र चेक फिर्ता भएपछि मात्र प्रहरीसमक्ष उजुर गर्न पाइने भएकाले यस्ता धेरै मुद्दा कानुनी दायरामा आउन सकेका छैनन्।

चेक फिर्ता भएपछि पनि १० हजारदेखि एक लाख रुपैयाँसम्म धरौटी बुझाएर अभियुक्त रिहा हुनसक्छन्। त्यसैले ठूलो रकम ठगी गर्नेहरू केही दिन हिरासतमा बसेर रिहा हुने र सर्वसाधारणको रकम त्यत्तिकै खाइदिने गरेका अनेकौं मुद्दा आएको महानगरीय प्रहरी परिसर काठमाडौंका प्रमुख एसएसपी सुबोधराज घिमिरेले बताए। प्रहरी र अदालतले पनि केही गर्न नसक्ने भएपछि वार्षिक एक अर्ब रुपैयाँबराबरका ठगीका मुद्दा गुन्डाहरूका हातमा पुग्‍ने गरेका छन्। सरकारी नीति नहुँदा सर्वसाधारणले पनि फसेको रकम उठाउन गुन्डाकै शरण लिनुपर्ने अवस्था छ। यही कारण राजधानीमा अन्य अपराधसमेत बढेको प्रहरी स्रोतले बतायो। गुन्डाको डरले कतिपय ठगले पैसा फिर्ता दिने र त्यसमध्येबाटै गुन्डाले पनि रकम पाउने भएकाले बाहुबल भएका युवा यस्तो अवैध कारोबारमा संलग्न हुने क्रम बढेको छ।

एसएसपी घिमिरेले कतिपय युवा यस्तो रकम उठाउन एकपटक सफल भएपछि लगातार यही काममा लाग्दै नयाँ गुन्डा भएर निस्कने गरेका धेरै उदाहरण पाइएको बताए। थर्काएकै भरमा पैसा आउने भएपछि त्यतातिर लाग्ने युवा फस्दै जाँदा व्यक्ति अपहरण, ज्यान मार्ने उद्योगजस्ता अपराधमा पनि संलग्‍न हुने गरेको पाइएको छ। वैदेशिक रोजगारीका लागि अमेरिका, फ्रान्स, जापानलगायत देशमा पठाइदिने भन्दै ठग्नेहरू पनि कमजोर कानुनका कारण ‘चेक बाउन्स’ मा परी सजिलै रिहा भएका छन्।

ठगीका ठूला मुद्दा
तथ्यांकअनुसार एक करोड सात लाख ४२ हजारको चेक दिएर फिर्ता भएपछि ठगी गरेको आरोपमा हाँडीगाउँकी विमलालक्ष्मी शाह (खड्का), ४१ लाख ९० हजारमा लप्सीफेदी काठमाडौंकी मीरा दंगाल, ३२ लाख २५ हजारमा बलम्बुका बाबुकाजी श्रेष्ठ र ४५ लाखमा काठमाडौं १४ का राजकुमार थापा गोदारविरुद्ध अदालतमा मुद्दा दायर भएको छ। त्यस्तै २८ लाख ८३ हजार ६ सय ६८ रुपैयाँ ठगीमा काठमाडौं १६ का श्यामकृष्ण श्रेष्ठ, २६ लाखमा मोरङ मृगौलियाका शम्भुप्रसाद घिमिरे, ५५ लाखमा काठमाडौं १० का सुधीर बस्नेत, २० लाखमा ललितपुरका हितजेन गुरुङ र ४४ लाखमा काठमाडौं ३५ का कमलनारायण श्रेष्ठविरुद्ध पनि मुद्दा परेको छ। ५१ लाख ठगीमा बागलुङ घर भई ज्ञानेश्वर बस्ने राजकुमारी बिष्ट, ७१ लाखमा मुस्ताङका सुरेश गौतम, ४० लाखमा काठमाडौं १९ की शर्मिला सैंजू र २० लाख ५० हजार ठगीमा दीपक मनाङे भन्ने राजीव गुरुङविरुद्ध पनि मुद्दा परेको छ।

सहकारीमा सर्वसाधारणले जम्मा गरेको एक करोड ८६ लाख ३६ हजार तीन सय १३ रुपैयाँ फिर्ता नगरी मासिदिएको भन्दै परिदृश्य बचत तथा ऋण सहकारी संस्था कालीमाटी, तीन करोड १४ लाख ५५ हजार आठ सय ३० रुपैयाँ उठाई सावाँब्याज नदिएको भन्दै एक्जिमा बहुउद्देश्यीय सहकारी संस्था त्रिपुरेश्वर, ३८ लाख ठगेको भन्दै ज्योति निर्माण ऋण सहकारी संस्था मनिखेल, १५ लाख ७३ हजार सात सय ७५ रुपैयाँ मासिदिएको भन्दै दीपसिन्धु सेभिङ एन्ड क्रेडिट कोअपरेटिभ क्षेत्रपाटीका सञ्चालक र पदाधिकारीमाथि मुद्दा दायर भएका छन्।

यी प्रकरणमा मुख्य अभियुक्त फरार छन् भने पक्राउ परेकाहरू पनि धरौटी रकमसमेत नतिरी जेलमै बसेको प्रहरीले जनाएको छ। शुभश्री कोअपरेटिभ लिमिटेडका नौ सयभन्दा बढी बचतकर्ताको ६४ करोड ७७ लाख ६१ हजार पाँच सय ४३ रुपैयाँ हिनामिना गरेकोमा कोही पनि पक्राउ नपरेकाले अनुसन्धान हुनसकेको छैन।

बैंकिङ कसुर गरी सर्वसाधारणको रकम कर्जा लिई चुक्ता नगरेकोमा नेपाल राष्ट्र बैंकको जाहेरीले सावाँ मात्रै ४४ करोड ६० लाख अपचलनको आरोपमा क्रिस्टल फाइनान्सका दिव्यकुमार श्रेष्ठ, ३५ करोड ३१ लाख हिनामिना गरेको आरोपमा श्रीलंका मर्चेन्ट बैंककी रुबी जोशी, बाँसबारीका श्रीराम लामिछाने र सिनामंगलका गौरीशंकर चौधरीमाथि मुद्दा चलाइएको थियो। एच एन्ड बी बैंकका निरज नेपाल, कुमार ढकालसहित १० जनाले दुई करोड २२ लाख दुई हजार रुपैयाँ गुड फर पेमेन्ट चेक बनाई किर्ते गरेका थिए। सोही बैंकको ८३ करोड ४३ लाख ५० हजारबराबरको रकम हिनामिना गरेकोमा निरज नेपाल, महेश भुसाल र निर्मल नेपालमाथि मुद्दा चलेको थियो।

त्यसैगरी खातामा पैसा नभए पनि ३३ करोड ८० लाख २५ हजार भुक्तानी दिएर सर्वसाधारणको निक्षेप रकम सकेको आरोपमा एच एन्ड बीका निरज नेपाल र कुमार ढकालमाथि अर्को मुद्दा पनि परेको छ।

हिमालयन फाइनान्स लिमिटेड सुन्धाराबाट पाँच करोड ८१ लाख ठगी गरेकोमा ताहाचलका हिमालयभक्त प्रधानांग र कोटेश्वरका श्यामकृष्ण श्रेष्ठ अदालतको आदेशले जेल परेका छन्। वैभव फाइनान्स नयाँबानेश्वरका केशवनरसिंह भण्डारी अख्तियारीभन्दा बाहिर गई संस्थालाई हानि पु:याएको आरोपमा गत वैशाख १३ गतेदेखि नख्खु कारागारमा थुनामा रहेको प्रहरीले बतायो। नातेदारहरूका नाममा कर्जा दुरुपयोग गरेकोमा नेपाल बंगलादेश बैंकका पूर्वसञ्चालक जितबहादुर श्रेष्ठ, लक्ष्मीबहादुर श्रेष्ठसहित ११ जनामाथि अनुसन्धान भइरहेको छ।

from : http://www.annapost.com

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s